Është mbajtur këtë të mërkurë seanca e radhës në Gjykatën e Posaçme për ish-ministrin e Shëndetësisë, Ilir Beqaj, në lidhje me aferën e sterilizimit
Gjatë dëshmisë para togave të zeza, Beqaj pretendon se është hetuar një herë nga Krimet e Rënda për çështjen në fjalë. Ai vuri theksin te “parimi i gjësë së gjykuar”, duke artikuluar edhe një vendim pushimi të Prokurorisë së Tiranës më parë dhe që për të “janë pafajësi”
Ish-ministri tha se atë vendim ia kishte kërkuar disa herë SPAK-ut, por nuk ia kishte dhënë.
“I kërkova SPAK-ut disa herë të më japë një vendim të ish-Krimeve të Rënda, që e ka në arkivë. 5 herë e kam kërkuar dhe s’ma dhanë. E siguruam më pas nga Kuvendi, që na e dha, pasi ju kishte shkuar nga SPAK mes materialeve për komisionin hetimor.
Bëhet fjalë për vendimin e pushimit të një procedimi penal të prokurorit të Tiranës, Endrit Bimi. Ai vendim dhe vendimi i Prokuorisë së Tiranës, per mua janë pafajësi sipas parimit të gjësë së gjykuar. Ka dhe vendime unifikuese të Gjykatës së Lartë. I kujtoj gjykatës, që një nga rekomandimet e qeverisë të paraqitura nga ministri i Drejtësisë në Prokurorinë e Përgjithshme ishte: Sundimi i ligjit kërkohet respektimi strikt i të drejtave proceduralie të të pandehurve.”, – u shpreh ish-ministri në gjyq.
Edhe në seancën e fundit të 21 majit, ish-ministri Ilir Beqaj ka kërkuar në sallën e gjyqit pushimin e menjëhershëm të çështjes penale ndaj tij dhe shpalljen e pavlefshmërisë së vendimit të gjyqtares paraprake.
Ilir Beqaj është marrë i pandehur nga SPAK për veprën penale vjedhje duke shpërdoruar detyrën në kuadër të grupit të strukturuar kriminal. Gjykimi ndaj Ilir Beqajt po vazhdon me procedura të zakonshme, pasi nuk pranoi gjykimin e shkurtuar, duke pretenduar se do të rrëzojë akuzën e ngritur nga GJKKO.
Të pandehur për aferën e sterilizimit janë marrë edhe ish-zv.ministri Klodian Rjepaj, biznesmenit Ilir Rrapaj dhe anëtarët e Komisionit të Vlerësimit të Ofertave: Marsela Serjani, Saimir Kadiu, Petref Mersini, Arben Gjata, Genc Burazeri dhe Naile Ajazi (Abazi).
Hetimet gati 3-vjeçare të kryera nga SPAK kanë zbuluar shkelje të ligjit në procedurat e dhënies së njërit prej koncesioneve më të kushtueshme të sektorit të shëndetësisë, me qëllimin e vetëm të shpalljes fitues të kompanisë së Ilir Rrapajt dhe shtetasit Italian, Umbro Staccini. Referuar hetimeve, vlera e koncesionit që llogaritet rreth 100 milionë euro, është fryrë fiktivisht dhe dhjetëra milionë euro. Para që deri më tani, prokuroria nuk e ka zbuluar se në xhepat e kujt kanë shkuar.
Në lidhje me këtë dosje, SPAK lëshoi urdhër-arreste vetëm Klodjan Rrjepajn dhe Ilir Rrapajn në Gushtin e vitit të kaluar, por Ilir Beqaj u arrestua më vonë. Ai u vu në pranga në fillim të muajit korrik në lidhje me abuzimin me fondet e Bashkimit Europian gjatë kohës që ish-ministri drejtonte Agjencinë Shtetërore të Programimit Strategjik dhe Koordinimit të Ndihmës (SASPAC).
