Ministri i sportit italian, Vincenzo Spadafora, ka paralajmëruar se nuk ka garanci për kthimin e Serisë A, pavarësisht planeve për të lehtësuar masat e bllokimit, duke deklaruar se protokollet e sugjeruara të Federatës Italiane të Futbollit “nuk janë të mjaftueshme dhe kanë nevojë për rregullime”.
Të dielën u njoftua nga Kryeministri Italian, Giuseppe Conte, se vendi do të fillonte të hapej gradualisht, teksa rastet e raportuara të koronavirusit në vend kanë pësuar rënie.
Edhe pse një veprim i tillë sugjeron një kthim në diçka që i ngjan normalitetit, ministri i sportit, Spadafora, deklaroi se duhet pasur kujdes pasi pandemia Covid-19 mbetet një kërcënim i madh.
“Stërvitjet në grupe për sportin mund të fillojnë nga 18 maji, por vetëm nëse kushtet e sigurisë mund të konfirmohen gjatë javëve të ardhshme”, i tha ai Rai 1.
“FIGC (Federata Italiane e Futbollit) paraqiti mbrëmë një protokoll dhe komiteti shkencor e konsideroi atë të pamjaftueshëm, kështu që kërkohen rregullime. Vetëm në atë moment, kur të bihet dakord për protokollin, mund të vendosim nëse futbolli do të rinisë apo jo.
“Unë nuk dua ta penalizoj ose ngadalësoj rifillimin e futbollit, por më duhet të them që do të tregojmë kujdes sepse masat e sigurisë duhet të jenë të besueshme dhe funksionale.
“Ne e kuptojmë se bota e futbollit meriton respekt dhe mbështetje, pasi ajo është një nga burimet më të mëdha ekonomike në vend”.
