Autoriteti Rrugor Shqiptar ka hapur tenderin për ndërtimin e lotit 3 të rrugës Porto Romano në Durrës me një fond limit prej më shumë se 669 milionë lekë apo rreth 5.5 milionë euro. Sipas dokumentacionit që shoqëron projektin shihet se gjatësia e saj do të jetë 8 kilometra dhe përfshin një rrethrrotullim në pikën e Durrësit për të vazhduar brenda parkut energjetik dhe industrial të Porto-Romanos ku janë të vendoura depozitat e karburantit.
“Terreni ku do të ndërtohet rruga është tërësisht fushor, pa disnivele të ndjeshëm. Në pjesën e parë të saj, në një gjatësi rreth 1 km, ajo kalon në qendër të banuar, mbi aksin e një rruge ekzistuese, por të ngushtë dhe me shtëpi banimi në të dy anët. Pjesa tjetër e rrugës kalon në fushën ish kënetore të Durrësit. Kjo pjesë është e zhveshur nga ndërtimet, por janë të pranishëm rrjeti i kanaleve kullues dhe vaditës, si dhe disa rrugë, që lidhin zonat rurale në perëndim dhe lindje të fushës” thuhet në dokument.
Punimet parashikohen që të zgjasin për të gjitha fazat 12 muaj në total duke nisur nga dherat e prishjet deri tek zërat shtesë të spostimit të linjave elektrike. Në zoën ku prashikohet të kalojë rruga dhe ku nënvizohet se është zonë me ndërtime në një gjatësi prej 1 kilometra, duket se do të ketë edhe prishje të disave prej tyre për të bërë rrugën sipas parametrave. Kjo bien ë sy nga harta që është publikuar në faqen ë APP.
Për këtë tender ARRSH ka lënë në dispozicion datën 25 maj për paraqitjen e ofertave si dhe për hapjen e tyre. Aktualisht për shkak të COVID-19 ka një limitim të procedurave të prokurimit me një vendim të qeverisë që ka lënë të hapur vetëm mundësinë për ato që janë emergjente për shërbimin ndaj komunitetit apo të lidhura me situatën e fatkeqësisë natyrore që është në fuqi.
Deri më tani janë zhvilluar pa problem procedurat që lidhen me blerje medikamentesh dhe materialesh mjektësore, ato të ujësjellësave por edhe të procesit të rinndërtimit ndërsa ARRSH ka qenë e fokusuar tek puna në projekte tashmë të hapura siç janë Bypass-et në Jug të vendit si dhe Unaza e Madhe punimet për të cilën u njoftuan se do të rinisnin javën e shkuar. Rruga në Porto-Romano duket të jenë projekti më i ri që ARRSH parashikon të nisë në verë nëse të gjitha hallkat përfundojnë pa ankimime sikurse është bërë e shpeshtë dy viteve të fundit për projektet e reja që prokurohen. /Monitor/
