Avokati Spartak Ngjela thotë se kryeministri Edi Rama bëri gabim që hoqi dënimet drastike për përhapjen e pandemisë.
Duke komentuar ndryshimet në Kodin Penal, në një intervistë për Ora News, Ngjela tha se Rama pranoi propozimet e presidentit Meta, pasi ishte i detyruar të zgjidhte mes dy të këqijave, zgjodhi të keqen më të vogël.
“Rama bëri gabim që u tërhoq nga dënimet drastike sepse këtu krimi i organizuar e do epideminë. Nuk humbet gjë. Nuk e kanë gjë vdekjen ata.
Ato ishin shumë të ashpra por jo si në perëndim që janë shumë më të ashpra. Meta bëri kërkesën, Rama zgjodhi mes dy të këqijave, të ulë marzhin e dënimit apo të zvarrisë çështjen për tre muaj, mes këtyre zgjodhi të parën dhe Presidenti nuk e zhdekretonte dot.
Me anë të kësaj kuptojmë që ai mendoi se Rama do të thoshte jo dhe ai nuk do ta dekretonte. Fakti që Rama i tha po uljes së marzhit të dënimit, Meta e drodhi dhe nuk i shpëtonte dot”, tha Ngjela.
A ka shkelje?
Avokat Ngjela thotë: “Qëndrimin në shtëpi si ta jep qeveria si prokuroria është “arrest shtëpiak” vetëm se në rastin e prokurorisë të mbron një avokat, ndërsa në rastin e qeverisë kush të mbron?
Ne kemi pasur defekt se Kodi ynë Penal nuk e kishte parashikuar epideminë. Shkelje nuk diskutohet që ka, por pyetja bëhet nëse kjo shkelje bëhet për të shpëtuar jetën apo shkelje për të rritur fuqinë e dhunës shtetërore.
Këto shkelje që nuk diskutohet që janë shkelje të drejtave të njeriut. Njerëzit rrezikohen nga një virus vdekjeprurës apo për të forcuar qeverinë. Këtu do e shikojmë me vëmendje ku mbaron epidemia dhe ku fillon pushteti personal i një kryeministri.”
Avokati kujton se në momente të tilla izolimi, kriminaliteti gjen hapësirë sidomos në vjedhje të banesave ose lokaleve apo makinave.
“Kjo është e pritshme dhe do të ndodhte. Shtëpitë e lokalet dhe makinat janë të pasigurta, nga krimi i organizuar por më shumë nga krimi i rrugës”, tha Ngjela.
