Shtëpia e Bardhë njoftoi publikun se institucionet e specializuara po bëjnë kërkime mbi përfitimet e dritës së Diellit dhe lagështinë në zvogëlimin e kërcënimit të koronavirusit duke përftuar të dhëna inkurajuese në kushtet kur Presidenti Donald Trump po nxit shtetet të lëvizin për të rihapur ekonomitë e tyre.
Uilliam Bryan, drejtori i Sektorit të Shkencës dhe Teknologjisë në Departamentin e Sigurisë së Brendshme tha në një konferencë të Shtëpisë së Bardhë të enjten se ka “rezultate të reja” nga hulumtimet e fundit, të cilat sugjerojnë se drita diellore ka një efekt të fuqishëm në vrasjen e virusit në sipërfaqe dhe në ajër.
Bryan evidentoi se rrezet e diellit mund të vrasin koronavirusin brenda disa minutash.
Për më tepër, hulumtimet e reja nga drejtoria e Shkencës dhe Teknologjisë DHS në SHBA, zbuluan se jo vetëm rrezet e Diellit, por edhe lagështia e lartë dhe temperaturat e larta mund vrasin virusin kur ai shpërndahet nëpërmjet pështymës dhe kur gjendet në ajër. Sipas studimit virusi vdes më shpejt në prani të rrezeve të diellit dhe mbijeton më së miri në kushte shtëpie.
“Vëzhgimi ynë më i mrekullueshëm tregon efekti e fuqishëm që drita diellore ka në vrasjen e virusit në sipërfaqe dhe në ajër. Qytetarët duhet të jenë shumë të kujdesshëm për të dezinfektuar siç duhet zonat që nuk janë të ekspozuara ndaj rrezeve të diellit, veçanërisht ato që janë brenda hapësirave të brendshme. Alkooli mundet që ta vrasë virusin në 30 sekonda”. tha këshilltari i Shkencës dhe Teknologjisë në DHS, Bill Bryan.
Këto gjetje të përbashkëta midis drejtorisë së Shkencës dhe Teknologjisë së DHS dhe Task Forcës së ngritur nga Donald Trump, u zbuluan në konferencën e shtypit të Shtëpisë së Bardhë ditën e enjte.
Studimet e kaluara nuk kishin gjetur prova të forta që temperaturat e larta dhe lagështia më e lartë e pranverës dhe verës do të ndihmojnë në zvogëlimin e përhapjes së virusit.
Dr. Uilliam Bryan, drejtori i Sektorit të Shkencës dhe Teknologjisë në Departamentin e Sigurisë së Brendshme tha në konferencën për shtyp edhe se një laborator në Maryland po kryen testime mbi virusin që nga shkurti. “Virusi po vdes me një ritëm shumë më të shpejtë vetëm nga ekspozimi ndaj temperaturave më të larta dhe vetëm nga ekspozimi ndaj lagështisë,” tha Bryan.
Dr. Bryan tha se njohuritë në lidhje me këtë mund të ndihmojnë qeveritarët kur marrin vendime se si dhe kur të hapin ekonomitë e tyre shtetet. Sidoqoftë, ai theksoi se rezultatet e shfaqura të studimeve të dritës dhe nxehtësisë nuk zëvendësojnë rekomandimet për distancimin fizik në mjedise publike.
Trump, i cili vazhdimisht ka kërkuar lajme shpresëdhënëse në lidhje me përmbajtjen e virusit, është pyetur nëse është e rrezikshme të bësh njerëzit të mendojnë se do të ishin të sigurt duke shkuar jashtë në nxehtësi, duke marrë parasysh që kaq shumë njerëz kanë vdekur në Florida.
“Shpresoj që njerëzit të shijojnë diellin. Dhe nëse ka një ndikim, kjo është e shkëlqyer”, u përgjigj Trump. “Unë jam këtu për të prezantuar ide, sepse ne duam ide për të hequr qafe këtë gjë. Dhe nëse nxehtësia është e mirë, dhe nëse rrezet e diellit janë të mira, kjo është një gjë e shkëlqyer”, tha presidenti i SHBA.
Trump theksoi se studiuesit po shikonin gjithashtu efektet e dezinfektuesve në virus dhe pyesnin nëse ato mund të injektoheshin te njerëzit, duke thënë se virusi “iu bën një diçka të tmerrshme mushkërive, kështu që do të ishte interesante të kontrollohej”.
Bryan tha se nuk kishte komente për këtë.
