Nga Boldnews.al
Arben Ahmetaj, i emëruar nga kryeministri Edi Rama si ministër i Rindërtimit vetëm pak ditë pas tërmetit tragjik të 26 Nëntorit 2019, është zyrtari më i monitoruar nga Brukseli zyrtar, pas fondeve të dhëna në Konferencën e Donatorëve për rimëkëmbjen e pasojave shkatërruese të lëkundjeve sizmike.
Ahmetaj është personi përgjegjës nga qeveria shqiptare për përdorimin e shumës prej 1.15 miliard euro, pjesa më e madhe e të cilës kredi, dhe rreth 250 milionë euro ndihma, të siguruara nga Shqipëria në Konferencën e Donatorëve, të organizuar nga Komisioni Europian në 17 Shkurt 2020.
Në dy momente shumë të rëndësishme, Bashkimi Europian ka nënvizuar faktin se Brukseli do të monitorojë procesin e rindërtimit. Një mënyrë diplomatike, për të shprehur dyshimet për mënyrën se si mund t’i përdore Qeveria Shqiptare fondet e siguruara nga donatorët.
Presidentja e KE, Ursula von der Leyen, në përfundim të Konferencës së Donatorëve, deklaroi se “…(në Shqipëri) do dërgohen një grup ekspertësh në Shqipëri për të monitoruar procesin e rindërtimit”.
Zyrtarja e lartë e Komisionit Europian, gjithësesi, përmendi faktin se “monitorimi është në kuadër të një marrëveshje me qeverinë Shqiptare për të zbatuar në mënyrë të duhur rindërtimin”.
Pak javë më vonë, në 3 Mars 2020, ambasadori i Bashkimit Europian në Tiranë, Luigi Soreca, ritheksoi nevojën për monitorimin e procesit të rindërtimit në Shqipëri.
Në një aktivitet të Komitetit të Rindërtimit, thirrur nga ministri Arben Ahmetaj, Soreca u shpreh se “të gjitha projektet do të veprojnë në mënyrë transparente dhe llogaridhënëse”.
Natyrisht, është praktikë normale që çdo donator, përfshirë edhe strukturat e Bashkimit Europian, të monitorojnë përdorimin e fondeve që ata alokojnë për vende të ndryshme, përfshirë edhe Shqipërinë.
Por, në rastin e fondeve të Rindërtimit, zyrtarët përfaqësues të Bashkimit Europian e kanë ndjerë të nevojshme që ta thonë “me zë të lartë” se autoritetet shqiptare do të jenë në proces monitorimi për mënyrën se si do të përdoren fondet e Konferencës së Donatorëve.
Qeveria shqiptare, nëpërmjet kryeministrit Edi Rama dhe ministrit të Rindërtimit, Arben Ahmetaj, e kanë mirëpritur vendimin e Brukselit për të monitoruar rreptësisht mënyrën se si do të përdoren qindra milionë eurot e akorduara për procesin e ringritjes së shkollave dhe banesave të qytetarëve.
Përtej frazave diplomatike, duket qartë se Bashkimi Europian është skeptik për përdorimin me efikasitet të fondeve të dhëna nga ana e Qeverisë Shqiptare.
Dhe, natyrisht, ky skepticizëm, ose, duke përmendur termat diplomatikë, ky “monitorim”, lidhet më së pari me njeriun që do t’i menaxhojë ato- Arben Ahmetaj, ministrin e Rindërtimit.
Ahmetaj ka qenë një nga ministrat më të fuqishëm të kabinetit “Rama 1”. Ai mbajti postin e Ministrit të Ekonomisë, institucioni që zbatoi politikën e hapur qeveritare për kontratat e kontestuara të Partneritetit Publik- Privat (PPP).
Opozita e djathtë e lidh emrin e Ahmetajt me atë që e konsideron si “afera e inceneratorëve”. Zyrtarë të lartë të Partisë Demokratike e kanë akuzuar Ahmetajn që në krye të herës se i dorëzoi kontratat koncensionare të inceneratorëve një bashkëpunëtori të tij, Klodian Zotos.
Ahmetaj i ka kundërshtuar këto akuza. Por, gjithësesi përqëndrimi i tre inceneratorëve të përpunimit të mbetjeve tek emri i Klodian Zotos dhe personave të lidhur me të, nuk i e ndihmuan që të shmangte dyshimet mbi ministrin.
Në fillim të mandatit të dytë, Edi Rama i dha Ahmetajt një super-pushtet, duke forcuar kompetencat e ministrisë që drejtonte ai.
Megjithatë, për arsye të paqarta, kryeministri vendosi ta largonte Arben Ahmetajn nga kabineti qeveritar, në Dhjetor 2018.
Pas rreth një viti larg qeverisë, Ahmetaj u rikthye në postin e Ministrit të Rindërtimit, në Dhjetor 2019, pas tërmetit të 26 Nëntorit.
Së fundmi, Edi Rama e ngarkoi ministrin Ahmetaj edhe si personin kryesor përgjegjës për hartimin e politikës ekonomike për të përballuar krizën e shkaktuar nga Covid-19.
Këto kapërcime, por sidomos fakti që emri i Ahmetajt gjendet në të gjithë projektet miliardëshe dhe të dyshimta të qeverisë shqiptare, duket se kanë nxitur nevojën e Brukselit zyrtar për të fuqizuar receptorët e monitorimit të fondeve.
