Drejtori i Përgjithshëm i Monzës, Adriano Galliani, pretendon se disa klube të mëdha në Evropë rrezikojnë falimentimin për shkak të mungesës së të ardhurave gjatë pezullimit të kampionateve.
Ish-shefi ekzekutiv i Milanit është i shqetësuar për situatën financiare në futbollin evropian dhe thotë se futbolli do të përballet me një “problem që nuk po kuptohet plotësisht”.
Duke folur për “Telelombardia”, ai ka thënë:
“Llogaritë janë hedhur në erë për shkak të borxheve të klubeve dhe humbjes së të ardhurave nga TV. Situata është me të vërtetë dramatike”.
“Nuk është vetëm kësti i fundit i të drejtave të TV që mungojnë, por gjithashtu nuk ka të ardhura nga stadiumi. Klubet e mëdha rrezikojnë falimentimin, uljet e pagave nuk do të jenë të mjaftueshme”.
“Mendoni vetëm diçka, që Barcelona nga dyqani zyrtar mbledh 50 milion euro në vit, pasi Camp Nou është stadiumi i dytë më i vizituar në Spanjë. UEFA ka humbur një mal me para për shkak të shtyrjes së kampionatit Europian”.
“Fshati Olimpik i Tokios do të duhej të transformohej në një vend ku të banojnë njerëzit, por tani nuk mund të ndodhë kështu për shkak të shtyrjes së Lojërave Olimpike. Ka shumë probleme që nuk kuptohen”.
