Gonzalo Higuain aktualisht ndodhet në Argjentinë, pranë nënës së tij të sëmurë. Ai u lejua të fluturonte për në Argjentinë para se të përfundonte periudhën e karantinës 14-ditore në mënyrë që të ishte me nënën e tij Nancy e cila lufton kundër sëmundjes së kancerit.
Ndërsa në Itali, Serie A po punon prej kohësh për të filluar sezonin, ku aktualisht po bëhet dhe grumbullimi gradual i lojtarëve, duket se Higuain nuk do të bashkohet së shpejti me skuadrën.
Lajmin e bën të ditur, Sky Sports Italia, që bën të ditur se argjentinasi do të refuzojë thirrjen e klubit për të mbërritur në Torino, për të mos iu ndarë në këtë moment të vështirë mamasë së tij.
Madje siç vijon më tej raportimi, nëse Juventus do të shfaqet hapur kundër futbollistit, atëherë ai mund të braktisë përfundimisht bardhezinjtë, duke pranuar ofertat që ka në Katar apo MLS.
Kontrata e Higuain te Juventus përfundon në 2021, por vështirë të besosh se kjo datë do të respektohet.
