Avokati i njohur Ledio Braho e cilësoi një emergjencë të pazakontë dhe anti-Kushtetuese miratimin nga Kuvendi të ndryshimeve në Kodin Penal.
Braho tha se Kodi Penal e ka parashikuar qartë se ligjet që kërkojnë shumicë të cilësuar nuk mund të ndryshohet në kushtet e emergjencës së përshpejtuar, apo në situata të gjendjes së emergjencës.
“Megjithëse e kanë ditur se janë në shkelje të Kushtetutës, sërisht kanë shkuar deri në fund duke miratuar ndryshimet, pavarësisht se kanë ndryshuar nenet”, tha Braho, duke shtuar se është një situatë e pazakontë dhe tërësisht anti-Kushtetuese.
Braho tha se Shqipëria ka sot dënime administrative më të larta se vende të BE-së, madje që shkojnë deri në barazimin me dënime penale.
“Qeveria nuk i mjaftoi vetëm kjo, pra dënime administrative me gjoba deri në 1 mln lekë apo sekuestrim makine, por shkoi në edhe më tej duke ndryshuar Kodin Penal, megjithëse kemi edhe udhëzimet nga Konventa e të Drejtave të Njeriut që kundërshtojnë masa të tilla”, tha avokati Braho për Shijak Tv.
Avokati vuri theksin në faktin se Aktet Normative të Qeverisë janë zbatuar pa u botuar në Fletoren Zyrtare, çka përbën një shkelje të rëndë dhe janë nul përsa kohë nuk ishin botuar.
“Kushtetuta e ka të parashikuar qartë se të gjithë urdhërat me natyrën e Akteve Normative janë të detyrueshme të botohen në Fletoren Zyrtare, sepse nuk janë urdhëra individuale, por janë për të gjithë shqiptarët, të cilët nuk mund të njoftohen nëpërmjet faqes në rrjetet sociale të Kryeministrit.
Mendoj se të gjitha masat administrative që janë vendosur para se urdhërat të botohen, do të rrëzohen nga Gjykata Administrative”, tha Braho.
Avokati tha se Kushtetuta ka një parim themelor që është proporcionaliteti, që do të thotë se dënimet duhet të jenë proporcionale.
“Gjykata Kushtetuese ka praktika, dhe ka pasur raste që ka shqyrtuar ndryshime që janë bërë në Kodin Penal, pikërisht për shkak të mungesës së proporcionalitetit. E njëjta gjë ka ndodhur kur u ndryshua Kodi Penal përsa i takon armëmbajtjes pa leje, të armëve luftarake, dhe Gjykata Kushtetuese, pikërisht se nuk zbatohej parimi i proporcionalitetit, që është parim kushtetues, vendosi ti shfuqizonte ato nene”, tha Braho.
