Teksa coronavirusi preku vendin tonë, Instituti i Shëndetit Publik dha udhëzime për qytetarët se si ata mund të mbroheshin nga infektimi me COVID-19. Ndër masat mbrojtëse në luftën ndaj tij, është larja e duarve, dezinfektimi dhe mbajtja e maskës. Në kushtet kur qytetarët u dyndën që të pajiseshin me dezenfektantë, farmacitë, madje edhe supermarketet na ofrojnë një gamë të gjerë të tyre, të cilat në përbërje kanë përqindje të ndryshme alkooli.
Alkooli mbi 60% ka veti të asgjësojë bakteret që shkaktojnë sëmundje, përkatësisht patogjenët, duke i zbërthyer proteinat, përgjysmuar qelizën dhe duke ia çrregulluar metabolizmin. Por ajo që përbën shqetësim është abuzimi i kompanive të prodhuesve të dezinfektantëve, të cilët mashtrojnë qytetarët me përqindjen e alkoolit në dezenfektantë dhe në disa raste edhe me mungesën e tij.
Ne dërguam për analizë 4 mostra të dezinfektantëve xhel dhe të lëngshëm, të firmave të ndryshme, të përzgjedhur në mënyrë rastësore, për të vlerësuar parametrat e cilësisë, nga një laborator i certifikuar,. Pas analizës së kryer u vu re që 2 prej mostrave të dezinfektantëve ishin brenda normave mbi 60%, ndërsa një rast ishte nën nivelin 60%, ndërsa në një dizenfektant në formë xheli, shohim që nuk ka përmbajtje alkooli.
Duket se te gjitha strukturat e shendetit publik janë fokusuar te Akti Normativ i qeverisë në lidhje me situatën nga COVID-19, duke harruar disa detaje që rrezikojnë shëndetin e publikut sic jane dezenfektantët. Problem tjetër është se në kohën kur të gjitha marketet po dezinfektohen, nuk dihen saktësisht se cilat kompani e kryejnë këtë dezinfektim, a janë të licensuara, a kanë medikamentet që janë të aporvuara në listën e Ministrisë së Shëndetësisë, pasi janë në kontakt me ushqimin. /alert.al/
