Nga Boldnews.al
“Jemi në luftë me një armik të padukshëm”, do të deklaronte Edi Rama rreth 1 muaj më parë, duke iu referuar epidemisë së koronavirusit. Asnjëherë në deklaratat e tij nuk përmendi termat realë, epidemi apo pandemi, por herë e quan luftë dhe herë flamë. Fatkeqësisht në termat e tij ranë pothuajse të gjithë politikanët, në pozitë dhe opozitë, brenda dhe jashtë Parlamentit, duke i shërbyer ndoshta padashur tezës së Kryeministrit, si një vend në luftë.
Dhe si për të plotësuar tablonë e luftës, Rama nuk nguroi të nxjerrë në rrugë Forcat e Armatosura bashkë me autoblinda, që patrulllojnë edhe sot e kësaj dite, me një ndryshim, që kanë hequr armët që mbanin në ditët e para.
Nëse i referohemi fjalorit të gjuhës shqipe, fjala luftë ka këto kuptime:
- ndeshje e armatosur ndërmjet shtetesh a forcash kundërshtare; përleshje e armatosur, betejë, luftim; koha sa vazhdon kjo ndeshje dhe gjendja që krijohet ndërmjet palëve kundërshtare: luftë për liri e pavarësi; luftë civile (qytetare) luftë e armatosur ndërmjet forcave të klasave kundërshtare brenda një shteti; luftë e ftohtë, luftë pa armë, luftë me presione e me bllokada;
- edhe kuptim i figurshëm; përpjekje këmbëngulëse dhe e pandërprerë për t’ia arritur një qëllimi: lufta për emancipimin e gjithanshëm; lufta kundër dëmtuesve të bimëve (kundër korrupsionit, kundër pasojave të tërmetit); në luftë me…
- ballafaqim e ndeshje ndërmjet mendimesh, pikëpamjesh etj. që janë të papajtueshme: luftë e brendshme; lufta e së resë me të vjetrën.
Në deklarimet e tij, Rama nuk e ka përdorur në kuptimin figurativ, por e ka cilësuar një luftë të mirëfilltë, ka përcaktuar edhe armikun, që e quan të padukshëm dhe tinzar. Dhe në vijim të logjikës së tij, nuk nguronte të tregonte edhe arkivolet që transportoheshin me makina ushtrie në Itali, apo të parashikonte skenarët me mijëra të vdekur që mund të shkaktoheshin nga kjo luftë.
Dhe në këtë të fundit pati edhe ndihmën e disa të ashtëquajturve shkencëtarë, që shfaqen edhe sot në ekrane televizivë dhe një ditë flasin për skenarin italian, pastaj hidhen te ai kinez, shkojnë në Korenë e Jugut dhe në fund pranojnë se s´mund të kuptojnë atë që po ndodh në Shqipëri.
Në fakt s´mund t´a kuptojnë, përsa kohë pranojnë logjikën e Edi Ramës se jemi në një luftë dhe me një armik të padukshëm dhe kanë zgjedhur të mos përdorin fjalët epidemi apo pandemi, sikundër e ka shpallur OBSH, dhe as të pohojnë se kjo “luftë” nuk fitohet me polici e ushtri, por me virologë, epidemiologë, infeksionistë dhe me testime, jo për statistikë, por të mbyllur në karantinë të prekurit.
Nëse pranojmë konceptin e Ramës se “jemi në luftë”, ata që fatkeqësisht infektohen, atëherë janë armiqtë që fshehin brenda tyre “armikun e padukshëm” ose bashkëpunëtorë të tij, që më pas “plagosen” ose “vriten” sikundër mund të shprehet Kryeministri.
Në fakt ata thjesht janë pacientë të prekur nga një virus, sikundër ka pasur me dhjetra të tjerë në vitet e mëparshme me viruse me emra të tjerë.
Por ky “armik i padukshëm” sikundër deklarohet Rama, nuk është edhe aq, përsa kohë mund të identifikohet përmes testeve, apo mund të mbrohesh thjesht me tre rregulla: një maskë në fytyrë, një palë doreza kur del në rrugë, apo shkon në një supermarket, dhe ruajtja e një distance mbi 1.5 metra.
Deri më sot Rama luajti lojën e luftës, madje duke përdorur edhe disa deklarime, përfshi këtu edhe ato të Presidentit amerikan Donald Trump, për luftën me armikun, ndërkohë që më parë e kishte quajtur thjesht virusi kinez.
Dhe ideja se jemi në luftë, duke shpallur masa ekstreme dhe krijuar më shumë një terror psikologjik dhe frikë, ishte strategjia jo vetëm për të mbrojtur në maksimumin e mundshëm sistemin shëndetësor, por edhe për të minimizuar çdo kosto që krijohej nga kjo situatë.
Madje shkoi deri atje sa të përcaktonte edhe menutë e ushqimeve për familjet shqiptare, kur deklaronte se “ne jemi në luftë dhe s´mund të konsumojmë si në kohë paqeje”.
Në fakt të gjithë tezën e Ramës për luftë e rrëzon Presidenti i Gjermanisë, Frank-Walter Steinmeier.
“Jo, kjo pandemi nuk është luftë. Kombet nuk luftojnë kundër kombeve dhe as ushtarët kundër ushtarëve. Përkundrazi, është një provë e njerëzimit tonë. Ajo sjell më të mirën dhe më të keqin tek njerëzit. Le t’i tregojmë njëri-tjetrit më të mirat tek ne. T’ia tregojmë Evropës. Gjermania nuk mund të dalë nga kjo krizë e fortë dhe e shëndetshme nëse fqinjët tanë nuk janë të fortë dhe të shëndetshëm“, tha ai në mesazhin drejtuar kombit gjerman.
Në asnjë rrjesht të mesazhit të Presidentit gjerman nuk gjen mbjellje frike dhe terrori psikologjik, dhe aq më tepër arkivolë që ngarkohen në makina ushtrie.
Dhe po të kihen parasysh shifrat, Gjermania po e përballon më mirë nga të gjitha vendet atë që Rama e quan luftë, dhe Presidenti gjerman e konsideron një provë të njerëzimit.
