Një zjarr ka rënë në një dyqan që tregtonte bateri makinash në një kompleks pallatesh në rrugën ‘Dritan Hoxha’ në Laprakë. Kjo ka shkaktuar panik te banorët, të cilët kanë ‘harruar’ karantinën dhe kanë vërshuar në rrugë të alarmuar.
Dyshohet se zjarri ka rënë si pasojë e një shkëndije elektrike, ndërsa bateritë e makinave që kanë një përmbajtje të madhe acidi kanë shkaktuar tym të madh në zonën e banuar.
Kjo ka krijuar panik te banorët, të cilët kanë dalë të alarmuar jashtë pallatit siç vihet re dhe në pamjet e siguruara. Dëmet materiale llogariten të vogla, falë ndërhyrjes në kohë nga forcave zjarrfikëse.
Raportohet se biznesi tregtonte me shumicë bateri makinash, pjesë xhenerike dhe goma. Për shkak të materialeve janë krijuar shtëllunga të mëdha tymi duke detyruar banorët të dalin në rrugë.
Ndërhyrja e zjarrfikëse për të shuar flakët ka zgjatur rreth 40 minuta si dhe policia ka krijuar një kordon sigurie për banorët, të cilët kishin dalë në rrugë.
Dyshohet se shkak i zjarrit është bërë një shkëndijë elektrike.
