“Shtrimet kanë rënë, si në Spitalin Infektiv si në Spitalin tonë”, thotë mjeku pneumolog i spitalit “Shefqet Ndroqi”, dr. Arjan Mezini duke vlerësuar se duhet bërë shtimi i testimeve dhe analiza e imunitetit.
Dr. Mezini evidenton se në spitalin COVID 2, janë 6 pacientë në terapi intensive, 4 janë në frymëmarrje të drejtuar dhe njëri është në intubim jo invaziv.
Nëse po ecim drejt daljes nga pandemia, Mezini nuk jep afate të sakta, por thotë se me rritjen e temperaturave infektimi do të bjerë.
“Ecuria në spitale është një indikator jo i drejtpërdrejtë. Në çdo epidemi, kur shfaqen rastet që duhet të shkojnë në spital, virusi e ka bërë xhiron në popullatë. Tregues i mirë është që në 2-3 ditët e fundit kemi pasur shumë pak shtrime. Është një virus i ri, thuhet se do të bashkëjetojë me ne, me muaj. Duket qenë virus respirator, infektimi do të bjerë me rritjen e temperaturave. Por duhet të jemi prapë më të kujdesshëm, jo më grumbullime masive dhe të kemi medikamente më efikase. Terapia është individuale sepse jo çdo medikament mund të përdoret tek të sëmurët me sëmundje kardiovaskulare”, deklaroi ai.
Në intervistë në distancë për Neës24, dr. Mezini u shpreh edhe pro rritjes së testimeve ndërsa shpjegoi se pse janë të rëndësishme dhe analizat për imunitetin.
“Praktika më e mirë do të ishte testimi më i gjerë. E kam kërkuar testimin për imunitetin. Mjekët imunologë mund të vendosen në vijën e parë. Analiza për imunitetin nuk është aq e kushtueshme sa tamponi. Mund ta bëjë çdo laborator. Në dijeninë time kjo është diskutuar. Znj. Tomini u shpreh se do të realizohet në laboratorin qendror që QSUT në Tiranë. Ajo tha së shpejti”, u shpreh mjeku Mezini.
