Kryeministri Edi Rama u shpreh sot i prerë se nuk do të lejojë të kalojë kufirin shqiptar, asnjë prej atyre shqiptarëve që janë rezident në vende të tjera.
Rama tha se personat e tjerë që kanë arsye madhore apo që nuk kanë qëndrim të përhershëm në shtetet e huaja, do të pranohen në Shqipëri, por me kusht që të qëndrojnë në karantinë 14 ditë në një hotel.
Kryeministri tha se emigrantët që do të kthehen, do të paguajnë vetë shërbimin e hotelit dhe ushqimet dhe do të kontrollohet me polici që të mos dalë nga dhoma.
“Në 24 orët e ardhshme do të hyjmë në një proces të ndërmjetëm, kush do të vij në kufi me dokumenta rezidence të vendeve të tjera nuk do të lejohet. Ndërsa kush do të vij për motivet e tjera do të karantinohet për 14 ditë në hotel me shpenzimet e veta.
Secili prej tyre do të marrë një dhomë dhe do paguajë me paratë e tij një çmim fiks për ushqimin.
Kjo është masë mbrojtëse për popullin tonë. Ardhja në Shqipëri nga vende të tjera ku janë rezident, është e papërgjegjshme ndaj njerëzve, familjes së tyre dhe vendit tonë.
Do trajtojmë çdo rast për secilin që do paraqitet në vijën kufitare, ata do të kalojnë 14 ditëshin e karantinës së detyruar, do të jenë të kontrolluar nga policia dhe do të ndalohen të dalin nga dhoma”, u shpreh kryeministri.
Sipas Ramës, në kufirin e Kakavijës nuk ka asnjë problem tani që flasim, ndërsa në Kapshticë kemi 19 makina të personave që janë banorë rezidentë në Greqi, të cilët nuk kanë asnjë urgjencë të posaçme, por kërkojnë të hyjnë për të takuar familjen.
“Në një kohë tjetër kjo që po them do të ishte absurde, por në këto kohë është e vetmja rrugë që ne kemi që të dekurajojmë maksimalisht hyrjet në kufi. Kush bën patriotin, kush bën vajtimtarin për shkeljet e të drejtave të njeriut përmes pengesës që i krijohet njerëzve për të hyrë në atdheun e tyre, synon të nxisë katastrofën e them pa më të voglin dyshim.
Sali Berisha ka vetëm një synim, si të rishkatërrojë edhe njëherë Shqipërinë për llogari të tij haluçinante. E solla këtë emër si zanafillën e një procesi skandaloz politik të nxitjes së rrëmujës, por në këtë rast është nxitje e një zinxhiri vdekjesh që është shumë larg së qeni ai që do të ishte nëse do të shkonim me mendtë e Saliut dha atyre që i bien këtij avazi. Është e patolerueshme që të nxiten njerëzit që të vijnë drejt kufijve dhe të nxitet konflikti me policët në kufi“, tha Rama.
Ai ka bërë dhe një apel ndaj qytetarëve të Shkodrës, duke u kërkuar të zbatojnë rregullat dhe të kujdesen, pasi ekziston rreziku të kthehen në një bombë e kurdisur me sahat.
“Apel ndaj banorëve të Shkodrës, bëni kujdes maksimal dhe respektoni rregullat, pasi Shkodra po kthehet në një bombë të kurdisur me sahat”, u shpreh ai.
