Nga Boldnews.al
Një tender për blerjen e 240 monitorëve për aparaturat mjekësore, me vlerë rreth 1.5 milionë euro, është mbyllur mbrëmjen e djeshme nga Ministria e Shëndetësisë, në mungesë të plotë transparence.
Në kuadër të masave emergjente për sigurimin e aparaturave mjekësore, me qëllim përballimin e epidemisë COVID-19, institucioni i drejtuar nga Ogerta Manastirliu, ka shpallur mbrëmjen e së Enjtes (dt.2 Prill 2020) një tender 24 orësh, për blerjen e monitorëve.
“Boldnews.al” ka mësuar nga burime konfidenciale se në tenderin, e zhvilluar me procedurë të drejtëpërdrejtë, Ministria e Shëndetësisë ka ftuar për të paraqitur ofertat e tyre 6 kompani.
Nga ftesat e Ministrisë së Shëndetësisë janë përjashtuar kompani në Shqipëri, të cilat përfaqësojnë produkte të firmave të njohura botërore, si Siemens, Toshiba, Philips, e të tjerë.
Burime e redaksisë deklarojnë se Ministria e Shëndetësisë ka vendosur të vlerësojë me 60% ofertën që siguron në afat më të shkurtër monitorët dhe 40% çmimin më të ulët të monitorëve.
Pra, Ministria e Shëndetësisë, për shkak të emergjencës, ka parashikuar që të vlerësonte më shumë kompaninë që i dorëzonte më shpejt.
Por, pavarësisht “urgjencës” së procedurave, “Boldnews.al” mëson se, në përfundim të procedurave të tenderit, Ministria e Shëndetësisë ende nuk e ka nënshkruar kontratën me kompaninë fituese.
Kjo “vonesë” ka krijuar dyshime tek ekspertët e fushës se, pavarësisht se ka deklaruar dorëzimin sa më të shpejtë të monitorëve, kompania fituese ende nuk i ka në gjendje ato.
E, për këtë arsye, është gjetur mekanizmi i “vonesës” në nënshkrimin e kontratës, me qëllimin që t’i largojë kompanisë fituese “stresin” e kohës së limituar.
Burime të redaksisë njoftojnë se tenderi është fituar nga një kompani, e cila është njohur për afërsinë me Ministren e Shëndetësisë, Ogerta Manastirliu, si edhe rezulton të jetë një prej konkurentëve që ka fituar tendera të shumtë gjatë mandatit të saj në krye të ministrisë.
Po ashtu, tenderat urgjentë dëshmojnë edhe për një problematikë të theksuar në menaxhimin e situatës nga ana e Qeverisë Shqiptare.
Pavarësisht se pandemia COVID-19 ishte në portat e Shqipërisë, kryeministri Edi Rama dhe ministrja e Shëndetësisë, Ogerta Manastirliu, deklaronin në fillim të muajit Mars se kishin marrë të gjithë masat për përballimin e pandemisë.
Por, tenderat “e urgjencës” dëshmojnë se institucionet shqiptare nuk kishin siguruara as kushtet minimale.
Në situatë emergjente, edhe pajisjet e reja mjekësore që blihen me tenderat e drejtëpërdrejtë, janë të një cilësie shumë larg asaj të nevojshme.
Ndërkohë që vendet e Bashkimit Europian kanë bllokuar përkohësisht shitjen e aparaturave mjekësore, tenderat e Ministrisë së Shëndetësisë, me shumë mundësi, do të sigurojnë pajisje të një cilësie shumë të ulët, nga vende jashtë Bashkimit Europian e, me shumë mundësi, në Kinë.
