Departamenti amerikan i Shtetit ka konfirmuar vdekjen e zyrtarit të parë nga koronavirusi. Lajmin e bëri të ditur Sekretari i Shtetit Mike Pompeo gjatë një konference për shtyp.
“Një zyrtar i Departamentit të Shtetit ka ndërruar jetë si rezultat i këtij virusi [korona]. Kemi gjithashtu anëtarë të tjerë të ekipit që janë sëmurur me COVID-19. Mendoj se jemi tani deri në katër ose pesë duzinë njerëzish që kanë rezultuar pozitivë brenda Departamentit të Shtetit, që përfshin stafin tonë të punësuar në vend, ekipin e plotë të Departamentit të Shtetit”, tha Pompeo.
Ai nuk dha detaje të më tejshme sa i përket zyrtarit që ka ndërruar jetë.
Nga ana tjetër, Pentagoni konfirmoi të hënën se një anëtar i shërbimit amerikan që rezultoi pozitiv për koronavirus ka humbur jetën.
