Një pacient 79 vjeçar ka humbur jetën mëngjesin e sotëm, duke e çuar në 11 numrin e personave që kanë vdekur si pasojë e Covid 19.
Njoftimi u bë nga Ministria e Shëndetësisë, sipas të cilës 79-vjeçari nga Tirana, humbi jetën si pasojë e një infarkti, ndërsa ishte i shtruar te Infektivi pasi ishte prekur nga koronavirusi.
“Mëngjesin e sotëm ka ndërruar jetë në spitalin Infektiv një pacient 79-vjeçar nga Tirana, i konfirmuar me COVID-19. 79-vjeçari me inicialet B.H. ishte prej 18 ditësh i shtruar në spitalin infektiv.
I moshuari ishte përmirësuar ditët e fundit por ndërroi jetë nga një infarkt kardiak. 79-vjeçari është viktima e 11 e prekur nga COVID-19 në Shqipëri. Ministria e Shëndetësisë i shpreh ngushëllimet familjes së të ndjerit”, thuhet në njoftim.
Gjithashtu, Ministria e Shëndetësisë bëri të ditur se në 24 orët e fundit janë shtuar 11 raste të reja duke e çuar numrin total të të infektuarve në 223 raste.
Në total, janë kryer 1526 testime, nga të cilat 90 në 24 orët e fundit.
