“Në fund të prillit nis rënia e Covid 19″/ Virologu italian: Piku i rasteve ende s´ka ardhur

Faza më e keqe e koronavirusit, në Itali, apo siç konsiderohet, piku, që përbën edhe kurbën më të lartë të infektimit, pritet javën e ardhshme.

Virologu Fabrizio Pregliasco tha për Corriere della Sera se piku mund të ndodhë brenda një jave, duke shtuar se ky moment shënon edhe maksimumin e rasteve të reja në një ditë.

Shenjat e para janë pozitive, pasi numri i infeksioneve të reja nuk po rritet në mënyrë të ndjeshme.

Virologu thotë se me kufizimet e vendosura, Italia ia ka dalë që të kthejë malin në kodër.

Në ditët në vazhdim do të pritet të shihet më shumë. Ekspertët thonë se më shumë se piku, e rëndësishme është që kurba të nisë të rrafshohet, me fjalë të tjera të mos ngrihet më.

LEXO EDHE  "Covid-19 nxorri lakuriq edhe oligarkët"/ Eksperti Dasho: Ku janë laboratorët e PPP

Po kur mund të nisë rënia? Virologu parashikon që kjo gjë të ndodhë nga fundi i muajit prill.

Më herët, një tjetër epidemiolog italian tha për Corriere se në fund të majit mund të ketë ndoshta zerim të rasteve.

Ndërkohë, sikundër dihet, ajo që po ndodh tani me shifrat është një fotografim i asaj që ka ndodhur me infeksionet një javë më parë.

Për këtë arsye, virologu Pregliasco thotë se numri i viktimave do të vazhdojë të jetë i lartë edhe për disa ditë.