Mjeku i njohur Tritan Kalo ka publikuar në rrjet disa foto që tregojnë grumbullimet e qytetarëve në zyrat e njësive administrative, ndërsa e konsideron situatën si skandaloze, në kohën kur vendi po përballet me koronavirusin.
Madje Kalo pyet nëse në këtë vend ka policia bashkiake apo jo.
“Ndërgjegjësohuni, sa ende jemi larg kësaj sprove. Në të kundërt do të mbërrijmë në një ditë, që askush nuk do të mundet t’ju vijë në ndihmë. Së paku dëgjoni e shihni se çfarë po ndodh aktualisht në Itali, në Spanjë e gjetkë.
A ka Polici bashkiake të pranishme në këto njësi vendore?!
Jemi të gatshëm t’u ndihmojmë në çdo moment, por mos i shtyni kufijtë e mundësive të ndihmesës ndaj jush në honet e pamundësisë”, shkruan Kalo, duke postuar edhe disa nga fotot që tregojnë papërgjegjshmërinë e qytetarëve, por edhe inekzistecën e policisë, veçanërisht asaj bashkiake.
Postimi i Tritan Kalos
“Njësia Administrative nr. 2 e nr. 3, Tiranë më 25 mars 2020, ora 12:45. Në vijë ajrore vetëm 70-80 metra e ndajnë këtë grumbullim njerëzish nga dhjetëra vëllezër e motra të tyre të hospitalizuar në Shërbimin e Sëmundjeve Infektive të QSUT “Nënë Tereza” për Covid-19.
Ju lutem, më shumë respekt, më shumë dashuri e më shumë vlerësim për jetët tuaja. Me këtë mënyrë të papërgjegjëshme sjelljeje, do t’i shtoni rrezikun vetes suaj që të sëmureni nga Sars-Cov2/Covid 19.
Kapacitetet në burime njerëzore dhe në infrastrukturën e shtrimeve spitalore kanë një kufi, ato nuk janë të pakufijshme kudo në botë, përfshirë edhe Shqipërinë.
Ndërgjegjësohuni, sa ende jemi larg kësaj sprove. Në të kundërt do të mbërrijmë në një ditë, që askush nuk do të mundet t’ju vijë në ndihmë. Së paku dëgjoni e shihni se çfarë po ndodh aktualisht në Itali, në Spanjë e gjetkë.
A ka Polici bashkiake të pranishme në këto njësi vendore?!
Jemi të gatshëm t’u ndihmojmë në çdo moment, por mos i shtyni kufijtë e mundësive të ndihmesës ndaj jush në honet e pamundësisë.
Ju lutem!”
