Qeveria i është drejtuar me kërkesë zyrtare Kinës, për ndihmë me mjekë për të përballuar përhapjen e koronavirusit në Shqipëri.
Kjo u bë e ditur nga zv ministrja e Shëndetësisë, Mira Rakacolli, sipas të cilë kërkesa u bë nga Ambasada shqiptare në Pekin, drejtuar autoriteteve kineze.
Duke iu përgjigjur pyetjeve të gazetarëve, Rakacolli tha se testet edhe për mjekët që punojnë në vijën e parë me të sëmurë e konfirmuar, bëhen kur ka shenja të sëmundjes.
“Mjekët që punojnë në vijën e parë me të sëmurë që tashmë dihet që janë me COVID, përdorin mjete mbrojtëse që janë të provuara që janë efikase por në rast se një mjek pa dashje e dëmton e dyshon se mund të ketë rënë në kontakt me të sëmurin pa qenë i mbrojtur e do ta bëjë, patjetër, nëse shfaq shenja të sëmundjes, i bëhet testi, por testimi masiv pa pasur të dhënë që mund të jesh i infektuar nuk ka kuptim të bëhet.
Nëse sot rezulton negativ, mund të bëhesh nesër pozitiv”, tha Rakacolli, duke shtuar se deri më tani personat në karantinën shtetërore janë vetëm 2.
Lidhur me medikamentin për malarien që mund të eksperimentohet kundër COVID, Rakacolli tha se spitali Infektiv në protokollin e tij e ka përcaktuar edhe medikamentin antimalarik, i cili është i pranishëm në Shqipëri.
DENONCO