Nga Boldnews.al
Nga 230 postime që nga nëntë marsi dhe deri më tani, kryeministri Edi Rama ka përmendur në shkrime 86 herë fjalën “durim”. I referohet masave shtrënguese si mënyrë për të “luftuar” përhapjen e pandemisë së coronavirusit. Po aq shpesh edhe në daljet televizive nuk e mbyll ligjëratën e gjatë dhe kataklizmike të tij pa artikuluar me pompozitet sërish fjalën “durim”.
Kjo është formë qeverisëse dhe jo mënyrë për të luftuar një pandemi që sipas ekspertëve mund të zgjasë jo më shumë se katër muaj. Rama ka kaq vite që na ka kalitur me Durimin, aq sa po na e vendosos të gjithve këtë emër, për të harruar përgjithnjë fjalën tjetër: “shpëtim”.
Në 45 vite diktaturë, na u instalua në mendje që duhet të duroninim shtypjen nga pushteti, izolimin dhe varfërinë e trupit dhe të mendjes. Po ne vërtetë jemi populli që e deshi kaq shumë emrin Durim. U duk sikur e lanë pas komunizmin por ishte vetëm një mirazh që po zgjat me dekada të tëra.
Nëse ngremë paksa krye për të kërkuar më shumë të drejta dhe përkrahje shtetërore në këtë kohë pandemie, kryeministri na kujton dhunën. Është bërë mjeshtër i filmave triller që fatkeqësisht kohët e fundit po marrin nuanca të një horrori, duke terrorizuar gjithë shoqërinë që sot qëndron në masë e ngujuar në shtëpi si pasojë e përhapjes së “COVID-19”.
Një shoqëri e rritur në diktaturë që shkuli flokë dhe çirrte fytyrën kur vdiq diktatori Enver Hoxha, më shumë se dhimbje ishte edhe një frikë kolektive që pas vdekjes së tij do shpërthente lufta dhe “armiku i jashtëm” do na “shuante farën komuniste”. U deshën vetëm katër vite pas ikjes së Hoxhës që të kuptohej se komunizmi na kishte trasformuar dhe tjetërsuar deri në atë pikë sa na hoqi të drejtën e mendimit me Durimin…
Kush mund ta mendonte se në kohë demokracie mënyra qeverisëse nuk do të ndryshonte thelb, duke e vrarë që në gjizje fjalën shpëtim dhe rritur me aq kujdes nga Rilindja konceptin Durim! Ne sot duhet të durojmë coronavirusin, të vetëshërohemi në shtëpi nëse do kemi fat, pasi spitali për fat të keq është kthyer vetëm si karantinë disa ditore më shumë humbje në jetë njerëzish.
Duhet të durojmë edhe që pikërisht në kulmin e pandemisë qeveria firmos lëvrimin e 120 milionë eurove koncesione për një grup të vogël oligarkësh të lidhur me pushtetarë që bashkarisht pasurohen në kohë coronavirusi. Duhet kurajo dhe shumë durim të mbajmë mbi shpinë dhe psiqikë propagandën e pështirë që vret ngadalë edhe më shumë se vetë sëmundja e lig që thuhet se u ngjiz në Kinë.
Kudo në botë mesazhet e liderave janë sa lutëse aq edhe bindesë me fjalime të shkurtar, me akte ligjore qeveritare që shkojnë paralelisht në masa shtrënguese, por edhe përkrahëse për nevoja sociale dhe në mbështetje të biznesit, i cili po merr goditje të rëndë në këtë periudhë.
Ndërsa në vendin tonë Rama po na vet ë gjithëve emrin Durim… Kjo është ajo që gatoi dhe na serviri për shtatë vite qevetrosje dhe në ditët e sotme ka kulmin duke përdorur pandeminë për të realizuar qëllimin e kahershëm me fjalën Durim, që në fakt është një sinonim i pastër i nënshtrimit.
