VIDEO/ Vokshi: Policët spanjollë i këndojnë të karantinuarve, Rama frymëzon dhunë

Ish-deputetja e PD-së, Albana Vokshi, ka publikuar një video të policisë spanjolle, e cila këndon për fëmijët në karantinë.

Reagimi i Vokshit ka ardhur ndaj deklaratave të Kryeministrit Edi Rama, të cilin e konsideron një polic sadist që frymëzon dhunë.

Rama një ditë më parë tha se qytarët që do shkelin rregullat e shtetrrethimit do të përballen me forcën e policisë dhe ushtrisë, përfshi edhe përdorimin e gazit lotsjellës.

“Këngë për fëmijët, jo dhunë me shkop gome. Shikoni si ndryshon si nata me ditën policia algjeriane që Edi Rama e promovon për dhunën kundër qytetarëve me policinë europiane të një vendi demokratik si Spanja.

Policë që këndojnë dhe argëtojnë në distancë fëmijët. Video është e datës 17 Mars në një rajon të Spanjës së izoluar prej koronavirusit. Duke konsideruar argëtimin e fëmijëve në karantinë si shërbim për komunitetin, mesazhi i policisë spanjolle është frymëzues:

“Ky është gjithashtu një shërbim për qytetarin. Oficerët e policisë PolprAlmeria janë gjithmonë duke u kujdesur për më të voglin e shtëpisë. Kjo është @policia juaj ”, kanë shkruar ata në Twitter”, poston Vokshi.

LEXO EDHE  Atentati në Laç/ Dyshimet për konflikte mes autorëve dhe viktimave

Sipas saj, shqiptarët nuk kanë nevojë të dëgjojnë 3 herë në ditë nga kryeministri fjalime me kërcënime, me dhunë dhe mallkime.

“Si njeri me dy fytyra, Edi Rama paguan për një ditë 22 milionë për 4 ndërtues, por akoma nuk ka lëshuar asnjë qindarkë për pagat e qytetarëve që po rrinë të detyruar në shtëpi, për bizneset e mbyllura, për shëndetësinë e dobësuar akoma më shumë nga koncesionet e tij korruptive.

Kjo kohë e vështirë na ka treguar se ne, më shumë se kurrë, nuk kemi nevojë për një polic sadist në krye të qeverisë, por për një kryeministër normal, që qetëson qytetarët, i inkurajon ata, nuk i përçan, por i bashkon”, thekson Vokshi.