Kryeministri Edi Rama i është drejtuar me një tjetër mesazh qytetarëve, por edhe ka thumbuar opozitën lidhur me deklaratat e saj ndaj masave parandaluese për përhapjen e koronavirusit.
Rama u shpreh i prerë se policia dhe forcat e ushtrisë nga dita e hënë nuk do të tolerojnë askënd në thyerje të Akteve Normative.
https://www.facebook.com/edirama.al/videos/614189952467831/
“Përveç forcave të rendit dhe ushtrisë, asnjë nuk është në ndihmë për të gjithë ata që kanë nevojë. Mirënjohje për të gjithë ju që brenda shtëpisë po e parandaloni përparimin e armikut. Deri dje kemi mundur të ndihmojmë drejtpërdrejt 14 mijë familje.
Do të vazhdojmë pa pushim përditë të trokasim në dyert e pensionistëve të vetmuar, e familjeve me probleme të mëdha ekonomike, në familjet e prekura nga tërmeti që të mos u mungojë ushqimi bazë dhe medikamentet shëndetësore.
Shohin videot informative nga operacioni humanitar dhe flasin për shou. Po çfarë shou mo ju marrtë e mira. Flasin për vjedhje. Po ku e patë o ju marrtë e mira. Flasin për popullin që po vdes për bukë. Po për cilin popull kur vetë janë në shtëpi dhe flasin me I-phone. Flisni për mua sa të doni por respektoni ata që po shkojnë shtëpi në shtëpi.
Ne po bëjmë gjithçka dimë dhe mundemi. Nuk duam as lëvdata dhe medalje, pasi kjo është detyra jonë. Në këto kohë të mallkuara duhet respekt dhe mirënjohje”, tha Rama.
Në vijim ai shtoi se nesër në orën 05:00 të mëngjesit do të rihapet qarkullimi për ata që shkojnë në punë dhe deri në orën 13 të drekës do të kenë plot 8 orë për të bërë pazar. Sipas tij, këto orare janë të imponuara nga nevoja për përballimin e një lufte të madhe.
“Nesër e më tej forcat e rendit nuk do të tolerojë askënd që nuk e kupton që radha nëpër dyqane dhe xhirot nëpër rrugë janë të paligjshme dhe të patolerueshme.
Të gjithë duhet të adoptohemi me orarin e ri në këtë situatë dinamike”, tha Rama.
