Nga BoldNews.al
Kryeministri Edi Rama ka hyrë pa gjeneralin e qeverisë së tij në atë që ai e konsideron “luftë me armikun e padukshëm-korona virus”.
Për arsye ende të paqarta, Rama ka lënë tërësisht në hije Ministrin e Brendshëm, Sandër Lleshaj, njeriun që u tregua i gatshëm për të bombarduar me tymuese protestuesit e opozitës dhe Unazës së Re në protestat e një viti më parë.
Pas një jave mungese totale, Lleshaj u shfaq së fundi kalimthi me një postin në rrjetet sociale, ku riposton thëniet e Edi Ramës për ndalim qarkullimin total të së Dielës, si edhe për mundësinë e përdorimit të gazit lotsjellës kundër qytetarëve. Më tej, heshtje totale.
Ndërkohë, nga vila e tij në Surrel, kryeministri urdhëron trupat policore të ndërmarrin veprime force për disiplinimin e qytetarëve të cilët, në përmbushje te nevojave të tyre emergjente, thyejnë fashat e orareve të ndalim-qarkullimit, një detyrë që, në fakt, i takon Ministrit të Brendshëm.
Të dhëna, të pakonfirmuara zyrtarisht, flasin për një përplasje Rama-Lleshaj në një prej mbledhjeve të fundit të Qeverisë, para se Rama të “karantinohej” në shtëpinë e tij, në periferi të Tiranës.
Përtej aludimeve, është e qartë si drita e diellit që Sandër Lleshaj nuk duket të jetë në krye të detyrës.
Pozitat e tij drejtuese i ka marrë kryeministri Rama, i cili, krahas kryepolicit, po luan edhe figurat e mjekut, ekonomistit e psikologut për qytetarët shqiptarë, në një tentativë të dukshme për të fituar sa më shumë kredenciale politike.
Sandër Lleshaj, një ish-gjeneral që dha dorëheqjen nga karriera ushtarake për t’u përfshirë në jetën politike, qëndroi për rreth 5 vite në hije, si këshilltar i Edi Ramës për Sigurinë Kombëtare.
Lleshajt i ndriti fati politik në fund të vitit 2018, kur Rama e emëroi në postin e Ministrit të Brendshëm. Kryeministri kishte nevojë për një ministër të bindur në dikasterin më delikat, pasi kishte dështuar me dy figura politike-Saimir Tahiri dhe Fatmir Xhafaj.
Sandër Lleshaj e mori me hov të madh detyrën. Duke ruajtur një profil jo shumë të lartë politikë, për shkak të përvojës minimale në këtë fushë, Lleshaj u tregua ndërkohë aktiv për t’i shuar çdo kokëçarje shefit të tij.
Ai zgjodhi forcën e kërbaçit dhe gazit të shumtë lotsjellës përballë protestuesve të Unazës së Re, të cilët kundërshtonin projektin kontravers urbanistik, i cili u prishte shtëpitë e tyre.
Nga zyra e tij në Ministrinë e Brendshme, Lleshaj nisi krekosjen jo vetëm përballë protestuesve të Unazës, por edhe ndaj atyre opozitarë, ndërkohë që këta të fundit nuk po merrnin veten nga sasia e pamasë e gazit lotsjellës që Policia hodhi ndaj tyre në mënyrë të pakuptimtë.
Lleshaj lodroi edhe për disa muaj të tjerë, nën përkëdheljet e Edi Ramës, derisa erdhi momenti që “u zhduk” në këtë periudhë pandemie, pikërisht atëherë kur Policia e Shtetit ka më shumë nevojë për mbështetje sa më të madhe logjistike dhe programore, detyra të cilat janë nën kompetencën e Ministrit të Brendshëm.
Natyrisht, edhe pa praninë e Lleshajt, drejtuesit e Policisë do të vijojë të bëjnë detyrën e tyre, madje edhe më shumë se aq, nëse kryeministri Rama do të kërkojë “çudira” nga vila e Surrelit.
Por, të paktën “zhdukja” e tij prej shumë ditësh, nëse nuk ka ndonjë arsye madhore shëndetësore apo familjare, mund të jetë një konfirmim se ai ka bërë mirë që u dorëhoq nga grada “gjeneral”.
Sandër Lleshaj tregoi forcën në kohë “paqeje”. Në kohë “lufte”, ai ka zgjedhur të jetë qytetar i thjeshtë.
Gjithësesi, ka një thirrje të kryeministrit, e cila mund t’i ngjallë shqisat. Edi Rama deklaroi këtë të Shtunë, si gjithnjë në rrjetet sociale, se Policia mund të përdorë gazin lotsjellës kundër qytetarëve që nuk respektojnë distancën e sigurisë për mos-përhapjen e virusit.
Fakti që gazi lotsjellës mund të përdoret sërish kundër qytetarëve, ndoshta do të ringjallë shqisat e Sandër Lleshajt. Ai tashmë është një prej ekspertëve më të mirë për të mbytur qytetarët e thjeshtë me gaz.
