Zëdhënësja e PD-së, Ina Zhupa, ka reaguar në rrjetet sociale, pas njoftimit se Bashkia e Tiranës do të miratojë vendimin për shtyrjen në muajin qershor të shlyerjes së detyrimeve nga bizneset, për shkak të situatës së koronavirusit.
Zhupa shprehet se Bashkia e drejtuar nga Erion Veliaj po zbaton një nga propozimet e kreut demokrat Lulzim Basha për të ndihmuar bizneset.
“Masa e marrë nga Bashkia e Tiranës sot për bizneset është ekzakt çfarë Kryetari i Partisë Demokratike Lulzim Basha ka propozuar që në 11 Mars: Bizneset në zonat e prekura nga COVID-19 të mos paguajnë taksa dhe tarifa vendore për të pakten 3 muaj. Të njëjtën gjë kërkuam edhe dje.
Janë gjithmonë një hap pas propozimeve tona. Gjithmonë të vonuar dhe pa ide për t’u shërbyer në kohë qytetarëve. Rëndësi ka që ndjekin opozitën dhe zbatojnë propozimet e Partisë Demokratike në dobi të interesit të qytetarëve, të shëndetit, sigurisë dhe mirëqenies së tyre. Lehtësimi i bizneseve nga taksat në Tiranë është jetik.
Nën drejtimin e Erion Viajt, nga vjet, ato janë rritur me 33 %”, shkruan Zhupa, duke publikuar videon e mëposhtme.
