Pas Dibrës dhe Durrësit, një tjetër shtetas u gjobit me 700 mijë lekë pasi theu rregullin e vetëkarantinimit.
Policia tha se shtetasi B.D., 29 vjeç, banues në fshatin Rëmenj, Pogradec, u kap nga policia, duke qarkulluar, në një kohë që duhej të ishte i vetëkarantinuar.
“Ky shtetas, më datë 06.03.2020 është kthyer nga Italia dhe është njoftuar nga specialisti i Policisë së zonës për vetëkarantinim 14-ditor, për shkak se vinte nga një zonë e prekur nga virusi COVID-19, gjë të cilën nuk e ka respektuar.
Shtetasi i mësipërm është kapur nga shërbimet e Policisë Rrugore në aksin Pogradec-Rëmenj, duke lëvizur me mjetin e tij tip “Volkswagen Passat”.
Në zbatim të Aktit Normativ Nr. 3, datë 15.03.2020 ”Për marrjen e masave të veçanta administrative gjatë kohëzgjatjes së periudhës së infeksionit të shkaktuar nga virusi COVID-19″, ndaj këtij shtetasi u bë tërheqja e lejes së drejtimit, bllokimi i automjetit si edhe u ndëshkua me masën administrative në vlerën 700.000 lekë”, thuhet në njoftimin e policisë.
