Nga Boldnews.al
Kryeministri Edi Rama do të deklaronte pak ditë më parë nisjen e një lufte, me një armik të padukshëm, sikundër do të quante “Covid 19”, e cila do të zgjaste, pa dhënë një afat kohor. Deri këtu gjithçka duket normale, po të kihet parasysh fakti se koronavirusi është i panjohur dhe ka një përhapje të gjerë.
Pasi njoftoi nisjen e luftës, Rama shpalosi planin e tij, që konsistonte në vendosjen e disa masave me qëllim ndalimin e përhapjes së virusit.
Fillimisht mbylli shkollat, kopshtet, çerdhet, universitetet, më pas lokalet e restorantet, ndaloi qarkullimin e automjeteve, dhe së fundmi edhe qarkullimin e këmbësorëve, duke i dhënë si mundësi lëvizjeje deri në orën 18:00. Po kështu ndalohen grumbullimet në sheshe, parqe dhe shkëlësit ndëshkohen me gjoba.
Masat përgjithësisht janë respektuar, pavarësisht kundërshtive, ndërsa pritet që nga banesa e tij në Surrel, “komandanti i luftës” të shpalosë edhe planin ekonomik, që do të mund të shmangte një krizë për bizneset shqiptare.
Të gjitha masat merren virtualisht, komunikohen virtualisht dhe në fund marrin formën e Akteve Normative me forcën e një ligji.
Pra, me pak fjalë brenda pak ditësh u ngrit një shtet virtual, ku Kryeministri nga Surreli lëshon udhëzimet, më pas i miraton dhe kthehen në të zbatueshme.
Ndoshta ky mund të jetë një nga rastet unikale në Botë, ku pa pasur ministra të infektuar nga Covid 19, të mos mblidhet Qeveria për të miratuar një paketë të plotë. Në godinën e Qeverisë ka plot ambiente që ministrat mund të rrinë jo 1 apo 2 metra larg, por edhe 3 apo më shumë metra dhe të përcjellin një tjetër frymë, atë të një shteti që është në këmbë dhe jo i mbyllur secili në banesën e tij nga ku lëshohen urdhëra.
Nëse pak javë më parë, Qeveria, e kthyer tashmë në virtuale, do të merrte më seriozisht situatën, duke karantinuar me detyrim, dhe jo duke ia lënë në dëshirë, udhëtarëve që vinin nga zonat e prekura, sot punonjësit e policisë dhe ushtrisë nuk do të ruanin pas dere kush e ka thyer karantinën, kë ka takuar, apo ku ka pirë kafen.
Sikundër të paktën do të shpëtonte nga infektimi ato mjekë e infermierë, që janë ndeshur me rastet e të infektuarve, që u mungon minimalisht edhe ndërgjegjia për të treguar se nga vinin dhe çfarë simptomash kishin.
Situata në fillim u mor me shaka, ndoshta edhe nga fakti se kishte mjekë që shfaqeshin në studio dhe deklaronin se Covid 19 ishte një grip, të tjerë që na tregonin se ishim imunë meqë në këtë vend disa dekada më parë kishte pasur malarie, apo të tjerë që shpresonin se Italia do të përballonte koronavirusin.
Fatkeqësisht sistemi shëndetësor italian ra në kolaps dhe skenari që shpresohej se Italia do e përballonte ra, por kjo nuk ndryshoi qëndrimin për të pezulluar fluturimet me vendin fqinj, apo minimalisht për të futur në karantina qindra e qindra që vinin me tragete dhe avionë, disa nga frika dhe të tjerë që kishin mbaruar pushimet.
Në televizione shfaqeshin pamje të disa stafeve mjekësore që me termometër në dorë i dilnin para qytetarëve, në një kohë kur e gjithë Bota fliste se virusi qëndron i fshehur deri në 14 ditë.
Me pak fjalë për shkak të mosdijes ose besimit të tepruar, apo për shkak të përrallave me raki dhe hudhra, që asgjesonin armikun e padukshëm, u lanë të qarkullonin të lirë ata që më pas do ktheheshin në përhapës të Covid 19.
Përballë situatës së krijuar, Qeveria kaloi në panik, u vendosën me nxitim masat e detyrushme, dhe u ngrit me shpejtësi shteti virtual.
Të vetmit që sot ndodhen në vijën e parë të frontit dhe nuk janë virtualisht por fiyikisht janë mjekët, të kualifikuar ose jo, dhe policët, qofshin këto edhe ushtarakë, që me një maskë në fytyrë, po mundohen të mbajnë në kontroll situatën dhe të gjejnë ata që thyejnë karantinën.
Pjesa tjetër me argumentin e karantinimit ndodhen në shtëpi, nga ku lëshojnë akte e vendime, që ndoshta mund të kenë lidhje edhe me ëndrrat që shohin gjatë natës.
