Asnjë nga rastet e koronavirusit që po mbyt Italinë nuk ka ardhur direkt nga Kina. Tre të sëmurët, një italian e dy turistë, që vinin nga Wuhani, ku edhe ishin infektuar, u izoluan menjëherë dhe nuk ia kanë transmetuar askujt sëmundjen.
Ka një konfirmim të mëtejshëm të faktit që koronavirusi ishte prej kohësh në Itali në momentin e shpërthimit të problemit në Codogno dhe personat që rezultuan pozitivë ishin të infektuar të brezit të dytë apo të tretë, sipas studimit epidemiologjik të publikuar nga Instituti i Lartë i Shëndetit, duke llogaritur të dhënat deri më 9 mars, pra të 8342 personave pozitivë me Covid-19.
Sipas rasteve, pjesa më e madhe e të prekurve (62%) janë meshkuj, ndërsa të vdekurit, siç pritej, janë kryesisht persona shumë të moshuar.
Rastet në fëmijët e moshës 0-9 vjeç janë shumë të pakta (0,5%), 43 në numër. Në moshën 10-19 ka pasur 85 të infektuar (1%), në 20-29 janë 296 (3,5%), në moshën 30-39 vjeç janë 470 (5,6%), në 40-49 janë 891 (10,7%), në 50-59 janë 1453 (17,4%), në 60-69 janë 1471 (17,7%), në 70-79 janë 1785 (21,4%) dhe në moshën mbi 80 vjeç janë 1532 të infektuar(18,4%).
Siç vihet re, mosha nga 60 vjeç e sipër ka mbi 57% të rasteve. Megjithatë, vdekshmëria është zhvendosur në grupmoshat më të vjetra. Në grupmoshën 40-49 vjeç ka pasur vetëm një vdekje (0,3%), tre në 50-59 dhe 37 në moshat 60-69. Nga 70 në 79 vjeç, të vdekurit janë 114 (31,9%) dhe mbi 80 vjeç kanë qenë 202, 56,6% e numrit të të vdekurve.
Në spital janë shtruar 21% e të prekurve, 12% janë në terapi intensive. Asnjë midis moshave 0-18 vjeç nuk ka përfunduar në reanimacion. 10% e të shëruarve është e moshës midis 19 e 50 vjeç, 46% midis moshave 51 e 70, dhe 44% mbi 70 vjeç./Repubblica
