Qeveria shqiptare ka gati një vendim, që pritet të miratohet sot, në kuadrin e masave për situatën e krijuar, pas shfaqjes së rasteve me koronavirus.
Një ditë më parë Qeveria vendosi mbylljen e kopshteve, çerdheve dhe shkollave deri më 23 mars, ndërsa sot pritet të miratohet vendimi, sipas të cilit, njëri prej prindërve do të ketë ditë pushimi, për tu kujdesur për fëmijët.
Vendimi parashikon dhënien e pushimit nga data 10 deri në 23 mars dhe është gati të shpallet gjatë ditës.
Nga vendimi do të përfitojnë prindërit që punojnë në administratën publike në nivel qendror dhe lokal, të cilët kanë fëmijë në çerdhe, kopësht dhe parashkollor.
Por, gjithashtu, në vendim qeveria do t’i kërkojë edhe sektorit privat që të lejojë të njëjtën gjë për njëri nga prindërit, me qëllim mbajtjen e fëmijëve.
Deri sot në mesditë, në Shqipëri u konfirmuan 10 të prekur nga koronavirusi, ndërsa janë kryer mbi 116 teste ndaj personave të dyshuar.
Qeveria bllokoi sot udhëtimet nga Italia dhe anasjelltas duke urdhëruar uljen e avionëve në tokë si edhe futjen e trageteve në porte.
