Dokumentat/ Tenderi, lavdëroi “Lali Erin”, fitoi 120 milionë lekë pa garë

Kryebashkiaku Erion Veliaj me familjarë, banesa e të cilëve u dëmtua nga tërmeti

Nga Boldnews.al

Nuk përbën më asnjë çudi që kryetari i Bashkisë së Tiranës, Erion Veliaj, “i shpërblen” mirë financiarisht ata që mbrojnë publikisht “punët e tij” të mëdha, edhe kur ato të fundit krijojnë dyshime për favorizime të kompanive të caktuara.

Këtë fat të mirë financiar ka pasur së fundmi edhe studio arkitekturore “Archispace”, e cila ka fituar rreth 120 milionë lekë (të vjetra) nga një tender i mbyllur i zhvilluar nga Bashkia e Tiranës, për të kryer ekspertizën e dëmtimeve të shkaktuara në disa godina nga tërmeti i 26 Nëntorit.

Bashkia e Tiranës ka njoftuar se ka shpallur fituese kompaninë “Archispace” në tenderin me vlerë totale 11.800.000 lekë (të reja), pas një procedure “me negociim, pa shpallje paraprake”.

Bashkia, e drejtuar nga Veliaj, e ka argumentuar zhvillimin e kësaj procedure të mbyllur, referuar Aktit Normativ të Këshillit të Ministrave nr. 9, dt. 16.12.2019 “Për përballimin e pasojave të fatkeqësisë natyrore”.

Në bazë të ligjit “Për prokurimet publike”, kur vendoset aplikimi i kësaj procedure, autoriteti kontraktor, në rastin konkret Bashkia Tiranë, përzgjedh kompaninë private që do të përzgjedhë për realizimin e shërbimit.

Për tenderin “Loti i Parë: “Aktekspertizën e thelluar për objektet e dëmtuara nga tërmeti i datës 26.11.2019, të klasifikuara sipas shkallës së dëmtimit DS 4 dhe DS 5, në Njësinë Administrative Nr. 1, në Njësinë Administrative Nr. 2, dhe Njësinë Administrative Nr. 3”, Bashkia e Tiranë ka përzgjedhur kompaninë “Archispace”.

Kjo studio arkitekturore drejtohet nga urbanisti Rais Petrela. Urbanisti rezulton të jetë një ndër ekspertët, e renditur në vijën e parë të mbështetjes së projektit të Erion Veliajt për ndërtimin e Sheshit “Skënderbej”, një projekt që iu dha biznesmenit-klient, Shkëlqim Fusha, të “Fusha” shpk.

LEXO EDHE  Horoskopi 22 prill 2021, ja shenjat më me fat

Urbanisti Petrela, në një shkrim të publikuar në “shqiptarja.com” në 17 Qershor 2017 me titull “Pse i duhej Tiranës ndërhyrja në sheshin Skënderbej”, nuk i ka kursyer lëvdatat me superlativa për Bashkinë e kryeqytetit, të drejtuar nga Erion Veliaj.

“…Në fund të fundit, i duhet thënë një “bravo” Bashkisë së Tiranës që në këto pak vite arriti të evidentojë çfarë i mungonte asaj, si dhe thyerjen e monotonisë urbane duke e veshur atë në një kostum të pastër dhe të rregullt për vetë vlerat kulturore që ajo ka…”, shkruan Rais Petrela, pronar i studios arkitekturore “Archispace”.

Duket se Rais Petrela ka goditur “në shenjë”. Lëvdatat për Bashkinë e Erion Veliajt i janë “shpërblyer” me një fond prej 120 milionë lekësh (të vjetra), të përfituara nga një tender pa garë të zhvilluar së fundmi nga institucioni.