Luhet sonte në mbrëmje, ora 20:45, supersfida mes Juventusit dhe Interit, ndeshje e vlefshme për raundin e 26-të të Serisë A.
Në fakt në “Allianz Stadium” do të zhvillohet një derbi i pazakontë i Italisë, me dyer të mbyllura për shkak të situatës që ka krijuar Coronavirusi.
Gjithsesi vëmendja dhe emocionet priten të jenë të mëdha, pasi fituesi i këtij dueli, fare mirë mund të jetë edhe kampioni i ardhshëm i Serisë A. Në takimin e parë sezonal të zhvilluar në “San Siro”, Juventusi triumfoi me rezultatin 1-2 me golat e Paulo Dybalas dhe Gonzalo Higuanit, mes të cilëve shënoi me penallti Lautaro Martinez.
Interi do të kërkojë t’i kthejnë Juventusit reston duke i mundur në shtëpinë e tyre, me skuadrën zikaltër të cilët kanë treguar se në maksimumin e kapacitetit të tyre, mund të arrijnë çdo rezultat kundrejt çdo kundërshtari.
Sa u përket formacioneve, dyshimi më i madh i Sarrit i përket mbrojtjes, pikërisht qendrës, ku duhet të aktivizohet De Ligt ose Chiellini. Në sulm, i konfirmuar Cuadrado në tredhëmbëshin me Dybalan dhe Ronaldon. Treshja e mesfushës do të përbëhet nga Pjanic, Matuidi e Bentancur.
Tek Interi mes shtyllave kthehet Handanovic. Eriksen do ta nisë edhe këtë ndeshje nga stoli, gati për t’u hedhur në fushë në pjesën e dytë. Në mbrojtjen me tre, Bastoni është në avantazh ndaj Godinit. Tashmë është riaftësuar edhe Gagliarini.
Formacionet e mundshme:
Juventus (4-3-3): Szczesny; Danilo, De Ligt, Bonucci, Alex Sandro; Bentancur, Pjanic, Matuidi; Cuadrado, Dybala, Cristiano Ronaldo
Inter (3-5-2): Handanovic; Skriniar, De Vrij, Bastoni; Candreva, Vecino, Brozovic, Barella, Young; R Lukaku, Lautaro Martinez
