Gratë nëpër botë po ngrenë shqetësimin e diferencës së pagave midis burrave dhe grave, njohur si hendeku gjinor i pagave. Po çfarë është ekzaktësisht ky hendek?
“Është unë edhe t’i që kemi të njëjtën eksperiencë në punë, të njëjtën aftësi, të njëjtin arsim, e si pasojë të njëjtin produktivitet; unë e ti duhet të paguhemi njësoj, e nëse nuk paguhemi njësoj, diferenca jonë i atribuohet gjinisë”, shprehet Esmeralda Shehaj, pedagoge dhe eksperte ekonomie për çështjet gjinore.
Në një samit për gratë në 16 Janar, Ministrja e Financave, Anila Denaj tha se Shqipëria ka gjithashtu një problem me diferencën gjinore të pagave. Sipas shifrave të INSTAT–it burrat paguhen 10.7% më shumë se gratë.
“Ne humbim çdo vit 20% të produktit të brendshëm për frymë nga kjo pabarazi”, shprehet znj. Denaj.
Ekspertja Shehaj thotë se, mungesa e studimeve të thelluara nuk mund ta përcaktojë qarte nëse ka faktorë të diskriminimit gjinor apo faktorë lidhur me eksperiencën.
“As ministrja vetë nuk ka evidenca për të thënë që evidencat gjinore, diferencat që ka në pagë mes meshkujve dhe femrave i atribuohen gjinisë. [..] Çfarë përqindje e pagave shpjegohet nga elementët kryesorë përbërës të saj: eksperienca në punë, arsimi”, deklaron znj. Shehaj.
Sipas shifrave të INSTAT–it, hendeku në paga është më i lartë në ndërtim, industri nxjerrëse, aktivitete financiare. Ekspertja, Shehaj tha se këto janë industri të dominuara nga meshkujt, dhe gratë kanë akses të ulët në pozicione drejtuese.
“Kështu që një pjesë shumë e mirë e diferencave që ka në paga në këto industri, shpjegohet nga fakti që gratë janë pozicione jo të mira pune”, pohon ajo.
Hendeku i pagave mes grave dhe burrave është më i ulët në profesionet e artit, për nëpunësit, ligjvënësit, e forcat e armatosura./euronews.al
