Juventus dhe Inter do të përballen mbrëmjen e nesërme, në ndeshjen që mund të vendosë shumë për fatet e titullit kampion në Serinë A. Ndeshja do të luhet pa tifozë por që gjithsesi vëmendja ndaj saj do të jetë maksimale.
Por ndërkohë, një tjetër duel po ndodh mes skuadrave, këtë herë në prapaskena për sa i përket transferimit të dy futbollistëve. Bëhet fjalë për Federico Chiesën dhe Sandro Tonalin. Sulmuesi i Fiorentinës duket më pranë Juves, por Marotta ende nuk e ka thënë fjalën e fundit.
Sa i përket Tonalit, Inter është më i avantazhuar se Juventus, por ajo që pengon talentin e Italisë është mbipopullimi i mesfushës së Interit, që ka shumë lojtarë në pozicionin e 19-vjeçarit. Gjithsesi, Vecino duket me valixhe në duar, ashtu si Gagliardini.
Conte e pëlqen shumë djaloshin dhe në verë dëshira e tij mund të plotësohet. Edhe pse ka disa ekipe që interesohen për dyshen Chiesa-Tonali, duket se lufta do të përqendrohet mes Juventusit dhe Interit, që janë edhe ekipet më favorite për të siguruar shërbimet e dy italianëve.
