Kryeministri Edi Rama ka reaguar përmes rrjeteve sociale lidhur me një letër që Presidenti Ilir Meta i ka drejtuar Komisionerit për Zgjerimin, Oliver Varhelyi, ku shprehet i keqardhur sa i përket progres raportit të fundit të Komisionit Evropian për Shqipërinë.
“Për herë të parë që nga krijimi i Bashkimit Europian një president çon letra në Bruksel për të minuar urën mes Europës e vendit të tij! Për herë të parë në historinë e zgjerimit të BE një vend kandidat ka Brukselin ‘PRO’ dhe Presidentin e vet ‘KUNDËR’ vendit e KUNDËR vetë Brukselit”, shkruan Rama, referuar qëndrimit të Metës.
Në vijim, Kreu i Qeverisë e lidh qëndrimin dhe reagimin e Metës, me reformën në drejtësi.
“Sa nisi terapia intensive e Reformës në Drejtësi nisi dhe reaksioni me temperatura të larta në organizmin e shtetit të sëmurë prej kancerit të korrupsionit! Përpëlitjet e ethshme me bojkote, molotovë, dekrete janë thjesht pasoja të intensitetit të terapisë mbi kancerin.
Shqipëria mund ta marrë, mund të mos e marrë PO-në që meriton nga Këshilli Europian,po ama kurimi deri në fund i sëmundjes dërrmuese që i ka ngrënë trupin e shpirtin prej 30 vjetësh,as mund dhe as do ndalet dot me kriza të turpshme të provokuara nga terapia e Reformës në Drejtësi!”, shkruan Rama.
Letra e Metës
Në letrën e tij, Meta pranon konfliktin, por thekson se është mazhoranca socialiste ajo që ka një interpretim ndryshe të procedurës së emërimit të anëtarëve të Gjykatës Kushtetuese.
“Nuk mund të fsheh keqardhjen për “fotografimin e fakteve në lidhje me procesin e ngritjes së Gjykatës Kushtetuese. Sigurisht që ka një konflikt, por për shkak të interpretimit të ndryshëm të ligjit për emërimin e anëtarëve të Gjykatës Kushtetuese nga ana e shumicës socialiste, që kërkon të kapë Gjykatën Kushtetuese”, shkruan Meta.
Presidenti i kërkon Brukselit që të mbajë përzemër interesat e popullit shqiptar dhe paralajmëron: “Çdo mbështetje që gërryen më tej demokracinë dhe shtetin e së drejtës në vendin tim, do të përshkallëzojë krizën aktuale dhe do të inkurajojë shpopullimin e Shqipërisë”.
Ndërkohë që siguron se do të vazhdojë të qëndrojë në mbrojtje të Gjykatës Kushtetuese, Meta nënvizon se mbi shqetësimet e tij ende nuk ka marrë asnjë përgjigje nga EURALIUS, misioni që këshillon autoritetet mbi çështjet e drejtësisë.
