Kryetari i Kuvendit Gramoz Ruçi u shpreh se do e mirëpriste Presidentin Ilir Meta, sa herë ai të dëshironte të shkonte në Kuvend.
I pyetur lidhur me manifestimin e 2 marsit dhe deklaratat e Metës se do të hynte në Kuvend bashkë me popullin, Ruçi u tregua i matur dhe i rezervuar në përgjigje, duke tentuar të ulë tonet e debatit me Kreun e Shtetit.
“Marrëdhëniet e mia me Presidentin, nuk kam pse të shpik rrotën, i ka përcaktuar qartë Kushtetuta e Shqipërisë. Parlamenti një nga funksionet kryesore ka bërjen e ligjeve. Sikundër Presidenti ka të drejtë të kthejë ose dekretojë ligje. Secili institucion është sovran, si Parlamenti dhe Presidenti për dekretet që miraton apo kthen për rishqyrtuar në Kuvend”, tha Ruçi, duke komentuar në këtë mënyrë kthimin e ligjit për organizimin dhe funksionimin e Gjykatës Kushtetuese, ku me votat e Rilindjes, u ndryshua procedura e betimit të anëtarëve të Kushtetueses.
Gjithashtu Ruçi tha se Meta është i mirëpritur në Kuvend pasi e detyron Kushtetuta ta mirëpresë.
“Më obligon Kushtetuta të mirëpresë Presidentin sa herë dëshiron të vizitojë parlamentin ose do të mirëprisja dhe do të lexoja çdo mesazh që ai do i drejtonte Parlamentit.
Takimet e mia me Presidentin janë brenda kuadrit kushtetues dhe ligjor. Pyetja juaj është si socialist i vjetër e kam takuar apo jo, sic e dini presidenti është i depolitizuar nga Kushtetuta por dhe unë që nuk jam i detyruar nga Kushtetuta këto dy vite kam qenë totalisht i depolitizuar.
Besoj se nuk e kam përdorur asnjë sekond mikrofonin e kryetarit të Parlamentit për probleme partiake. Parë në këtë këndvështrim nëse Presidenti ka nevojë për qëndrime te maxhorancës kjo ka struktura partie mund ti thërrasë, ose ato nëse kanë problem me presidentin mund të kërkojnë takim me të”, tha Ruçi
