Dy nxënës 15-vjeçarë janë proceduar penalisht lidhur me ngjarjen e rëndë të ndodhur ditën e djeshme në shkollën “Janaq Kinica” në Fier, ku rreth 60 nxënës përfunduan në spital me shenja intoksikimi.
Nxënësit patën probleme me frymëmarrjen rreth orës 11:00, ndërsa dyshimet ishin se ishte përdorur spray piperi, që ishte hedhur në ambientet e shkollës.
Policia dhe Prokuroria nisën hetimet lidhur me ngjarjen, ndërsa sot në një njoftim zyrtar thuhet se “specialistët për Hetimin e Krimeve në Komisariatin e Policisë Fier, nën drejtimin e Prokurorisë Fier, zbardhën ngjarjen e ndodhur ditën e djeshme, ku si pasojë e përdorimit të një sprajti me lëndë gazi, në ambientet e brendshme të shkollës, disa nxënës shfaqën shqetësime me frymëmarrjen dhe pasi morën ndihmën e parë në Spitalin Rajonal Fier, u larguan për në banesë”.
Në përfundim të veprimeve hetimore rezultoi se sprajti ishte përdorur nga 2 nxënës të kësaj shkolle, konkretisht A. M., 15 vjeç dhe A. H., 15 vjeç, të cilët u proceduan penalisht.
Materialet i kaluan Prokurorisë pranë Gjykatës së Shkallës së Parë Fier, për veprat penale “Ndotja e ajrit” dhe “Prishja e qetësisë publike”.
Ndërkohë mëngjesin e sotëm mësimi në shkollën “Janaq Kilica” ka nisur normalisht, ndërsa ka pasur edhe prezencë të policisë.
Ngjarja e ndodhur dje në Fier ishte e dyta brenda pak ditësh. Në rastin e parë shfaqën probleme 7 nxënës, ndërsa nuk pati një njoftim zyrtar lidhur me atë që kishte ndodhur.
