Ditën e sotme do të luhen të gjitha ndeshjet e javës së 25-të Kategorisë Superiore.
Gjithçka starton në orën 14:00 me sfidën ndërmjet Laçit dhe Bylisit. Një sfidë mjaft e fortë pasi të dy ekipet duan një vend në kupat e Europës.
Katër takimet e tjera luhen në orën 17:00. Tirana kryesuese luan në transfertë ndaj Flamurtarit një ndeshje e lehtë në letër por mund të mos rezultojë e tillë në fushën e lojës. Orges Shehi debuton në stolin e Kukësit në sfidën ndaj Vllaznisë, një ndeshje të cilën verilindorët do të tentojnë ta fitojnë me çdo kusht nëse duan të luftojnë deri në fund për titullin.
Kampionët në fuqi, Partizani, pas humbjes turpëruese në derbin e kryeqytetit, pret në “Selman Stërmasi” Teutën në një duel që duhet të marrë tre pikët për t’u ngritur dhe për të mos humbur përfundimisht trenin e kreut. Ndërkohë Skënderbeu do të përpiqet të shfrytëzojë në maksimum momentin e shkëlqyer që po kalon teksa do të tentojë të fitojë edhe sfidën e tretë radhazi në kampionat atë ndaj Luftëtarit të vendit të parafundit për t’u afruar me 4-shen e parë.
