Azilkërkuesve nga Siria nuk i ka shpëtuar as Shqipëria. Po cili është rrugëtimi që bëjnë sirianët për të ardhur në Shqipëri? Adil dhe Badër janë dy emigrantë sirianë nga Aleppo, të cilët prej një muaji po qëndrojnë në qendrën e pritjes së azilkërkuesve në Tiranë. Badëri, 18-vjeçar, humbi prindërit nga bombardimet në Aleppo, teksa nga frika e luftës, bashkë me shokët e tij mori rrugën për në Europë.
“Kam bërë mbi 800 km rrugë në këmbë, kam kaluar kufirin nga Siria në Turqi, pastaj kemi përshkuar gjithë Greqinë. Në Korçë kemi kaluar kufirin me këmbë dhe ja ku jam.”, u shpreh Badëri.
Shqipëria është vend tranzit për të.
“Dua të iki, dua të iki në Itali…”, shtoi ai.
Shqipëria nuk i ka lënë shije të mirë 18-vjeçarit, pak ditë më parë, ai u grabit nga një grup djemsh, të cilët e dhunuan dhe i morën 70 euro, kursimet e fundit që i kishin mbetur.
“Më panë lekët te dyqani që isha dhe më thirrën jashtë, aty më kanë rrahur rreth 10 veta dhe më morën dhe lekët e fundit që kisha”, shtoi ai.
Goditjet i kanë lënë pasoja të riut nga Aleppo, i cili për shkak të dhunës çalon nga njëra këmbë, ndërsa ka dhe vështirësi në frymëmarrje. Edhe pse kanë kaluar disa ditë, Badëri nuk ka mundur dot të shkojë në spital. Nga ana tjetër, Adil është 33 vjeç, familja e tij ndodhet në Aleppo, teksa ai është larguar nga Siria, për një jetë më të mirë dhe për të tërhequr familjen e tij. Ndryshe nga Badëri, Adilit i pëlqen Shqipëria.
“Këtu është mirë, shqiptarë ka dhe të mirë dhe të këqij, por nëse do të gjej një punë do qëndroj”, tha ai.
Ai tregon se nuk do të kthehet në Siri, pavarësisht gjithçkaje.
“Jo, nuk kthehem kurrë në Siri, dua që të më bashkohet familja mua, por unë nuk kthehem më kurrë atje”, theksoi Adili.
Shqipëria është kryesisht thjesht një vend tranzit për emigrantët, por një pjesë e tyre qëndrojnë për një periudhë të gjatë kohe në vend. Vetëm gjatë vitit 2019-ë ishin 6604 persona që kërkuan azil në Shqipëri, teksa pjesa më e madhe e tyre janë nga Afganistani, Siria dhe Irani.
