Taulant Balla, kryetar i Grupit Parlamentar socialist, u shpreh se dekreti i Presidentit lidhur me procedurën e betimit të anëtarëve të Gjykatës Kushtetuese do të shqyrtohet nga Kuvendi.
Dy ditë më parë, Presidenti dekretoi kthimin në Kuvend të ligjit mbi organizimin dhe funksionimin e Gjykatës Kushtetuese, duke renditur një seri shkeljesh kushtetuese.
“Dekretin do e shqyrtojmë, por mund t’ju them se ndryshimi ligjor është një mekanizëm zhbllokues kur uzurpatorët e institucioneve rikthejnë skenarët e vjetër, atë të bllokimit”, tha Balla.
Në vijim ai pohoi se ndryshimet në fjalë janë propozuar nga deputeti Adnor Shameti, një nga njohësit më të mirë të së drejtës civile.
“Propozimet janë bërë nga deputeti Shameti, i cili është i mandatuar në zonën e Skraparit dhe uroj që Presidenti Meta mos e ketë këtu inatin me ligjin”, tha Balla.
I pyetur mbi deklaratat e Presidentit se do të shpërndajë Kuvendin, Balla tha se “Shqipëria është një Republikë Parlamentare e pastër, që do të thotë se Presidenti i vjen anash Kuvendit, ndërsa ky i fundit mund t’a shkarkojë Presidentin, vendim ky që çertifikohet më pas nga Kushtetuesja”.
“Kushtetuta dhe rregullorja e ka të përcaktuar kur Presidenti mund t’i drejtohet Kuvendit. ka një cështje që diskutohet me pathos në lloj lloj dyshemeje, banaku se njëri që fryhet e do shpërndajë parlamentin, Republika e Shqipërisë është e pastër Parlamentare, e kulluar Parlamentare dhe Ilir Meta i zgjedhur në atë detyrë në Kuvend, e di fare mirë këtë mungesë të së drejtës së Presidentit për të pasur këtë lloj qasje me Kuvendin. Kuvendi shkarkon presidentin, Presidenti në gjuhë popullore, i vjen anash Kuvendit sa i takon të drejtës për të shpërndarë Kuvendin.
Presidenti është në hetim nga Kuvendi për shkeljet Kushtetutese dhe nxis Komisionin Hetimor në një kohë sa më të shpejtë të lexojmë kërkesën që ne kemi dërguar.
Mos ia zini veshët kot dhe mos jepni më arsye diskutimesh në kafene që pas 15 marsit Presidenti do shpërndajë Parlamnentin se kjo është qesharake. Unë nuk flas për Besëlike unë flas për procedurë. Brenda Sulltan Novruzit besoj do kemi qendrimin përfundimtar të Komisionit të Venecias”, tha Balla.
