Qeveria e Italisë ka urdhëruar mbylljen e shkollave dhe universiteteve deri në mes të muajit mars, për shkak të gjendjes së emergjencës që është shkaktuar nga koronavirusi.
Vendimi i qeverisë për mbylljen e shkollave dhe universiteteve do të fillojë nesër dhe është mbështetur në vendimin e komisionit shkencor, që kishte rekomanduar tashmë mbylljen për një muaj të ngjarjeve sportive në të gjithë vendin.
Ndërkohë që ministri i Zhvillimit Ekonomik Stefano Patuanelli është në karantinë, pasi dyshohet të jetë prekur nga koronavirusi.
Udhëtimi për në Mozambik nga Presidenti Sergio Mattarella, i planifikuar për 10-12 Mars, është shtyrë.
Autoritetet kanë marrë masa të rrepta për të frenuar përhapjen e koronavirusit.
Për 30 ditë, italianët do të duhet të ndryshojnë stilin e jetesës. Pjesë e këtyre masave është ndalimi i shtrëngimit të duarve, asnjë përqafim, ndalohen aktivitetet me grumbullim të qytetarëve, madje dhe ato sportive.
Disa ndeshje të rëndësishme të kampionatit italian të futbollit janë shtyrë. Qeveria italiane synon gjithashtu që të shtojë numrin e shtretërve për pacientët që duhet të mbahen në kujdes intensiv.
Numri i personave që kanë humbur jetën nga koronavirusi në Itali ka shkuar në 79, ndërsa të infektuarit janë me mijëra.
