Kryeministri Edi Rama i ka dalë në krah homologut Albin Kurti lidhur me vendimin për heqjen e pjesshme të taksës që qeveria e mëparshme e Kosovës i kishte vendosur Serbisë.
E ndërsa e konsideron të drejtë vendimin e Kurtit, Rama ka sulmuar Ramush Haradinajn, i cili kritikoi Kreun e Qeverisë së Kosovës, lidhur me heqjen e taksës.
“Me paturpësi Ramushi ka nisur baltosjen e Albin Kurtit! Albini mund të jetë gjithçka po kurrë nuk është shërbëtor i Serbisë! Uroj të mos tutet prej sulmeve të ulëta për heqjen e taksës që shkatërroi reputacionin ndërkombëtar të Kosovës dhe viktimizoi Serbinë në sytë e botës!
Kurrë nuk është dëgjuar një idiotësi më e madhe se sa predikimi që taksa do sjellë njohjen e Kosovës nga Serbia dhe asgjë s’i ka bërë më shumë dëm Kosovës,se sa ajo taksë e kthyer nga një thirrje për vëmendje ndaj shkeljeve të CEFTA-s nga Serbia, në një litar në fytin e Kosovës!
Albin Kurti është në rrugën e duhur! Heqja e taksës do jetë dita e parë e tij si kryeministër në zyrë, jo më si lider opozite në zyrën e kryeministrit! Do t’i duhet të përballet me etiketën e “tradhëtarit” po ani, ajo etiketë i dallon udhëheqësit e paqes nga statujat e luftës,” shkruan Rama.
Mes Ramës dhe Haradinajt ka pasur në muajt e fundit reagime të forta dhe akuza të ndërsjellëta, veëanërisht pas idesë për shkembimin e territoreve mes Serbisë dhe Kosovës, ku Rama dhe Thaçi mbështesnin këtë ide.
