U kapën duke transportuar klandestinë, vlonjati dhe durrsakët prangosen në Korçë

Katër të rinj janë vënë në pranga dhe një tjetër është shpallur në kërkim nga policia e Korçës, pasi janë kapur duke transportuar tetë shtetas të huaj.

Personat e arrestuar janë shtetasit K.S., 24 vjeçe, banuese në Vlorë; F.K., 24 vjeç; R. D., 19 vjeç; R. H., 20 vjeç, banues në Durrës.

Ndërsa në kërkim është shpallur 17-vjeçari me iniciale R. K. banues në Durrës.

Sipas policisë, “shtetasit e mësipërm, janë kapur në flagrancë nga shërbimet e policisë pranë kryqëzimit të fshatit Libonik, Maliq, duke transportuar në drejtim të Tiranës me mjetet tip “SAAB”, “Fiat” dhe “Mercedes-Benz”, tetë shtetas të huaj, të cilëve nga hetimet e kryera rezulton se iu kishin premtuar kalimin drejt vendeve të BE-së, kundrejt pagesës prej 150 euro secilit”.

Në cilësinë e provës materiale u sekuestruan 4 automjete dhe 6 celularë.

LEXO EDHE  Koronavirusi prek deputetin shqiptar / Shpërthen ndaj Ramës: Trajtimi skandaloz

Materialet në ngarkim të tyre i kaluan Prokurorisë pranë Gjykatës së Shkallës së Parë Korçë për veprën penale “Ndihma për kalim të paligjshëm të kufijve, kryer në bashkëpunim” e cila dënohet me burgim nga pesë deri në dhjetë vjet.