Nga Boldnews.al
Ministresha e Ramës u “fye” dhe u fry rëndë kundër mediave, pas publikimit të skandalit ku një mësues kërkon favore seksuale ndaj një nxënësje të mitur në shkollën e Muzikës “Jakov Xoxa” në Fier. Ministrja e Arsimit Besa Shahini iu përvesh keq mediave, duke përdorur dorën e saj dhe gjuhën e Ramës.
“Kam mbi dy vite në Shqipëri që shoh jetët e grave dhe vajzave të shkatërrohen nën peshën e kazanit mediatik, dhe jo vetëm! Të gjithë ne kemi detyrimin të ngrejmë zërin përballë padrejtësisë apo abuzimit dhe të sigurohemi që shkaktarët e dëmit të marrin dënimin e duhur. Por në këtë proces nuk guxojmë të thellojmë dëmin ndaj të dëmtuarit”-tha Shahini, në një reagim në rrjetet sociale, e prekur thellë e më thellë, nga ajo që sipas saj media po shkatërron edhe më shumë viktimat e dhunës seksuale, qoftë edhe ajo kur vjen nga mësues.
Megjithatë, pa dashje ajo preku në tela kolegen ministreshë Elisa Spiropali. “Shfrytëzimi i viktimave të abuzimit apo neglizhencës, për arsye të tërheqjes së vëmendjes apo vetë-promovimit, është poshtërsi. Po të kishin interesin e të abuzuarve në mendje, nuk do t’i nxirrnin në media me identitet të plotë duke spekuluar me ditë të tëra për detaje të abuzimi”-tha ajo më tej. Po a i kujtohet kolegia e vyer, e plotfuqishme Elisë, e cila shkoi në Kavajë dhe nxorri identitetin e vajzës 13-vjeçare të abuzuar seksualisht në grup nga të paktën pesë persona?
Ku ishte Shahini, kjo “mbrojtëse” e përflaktë e të drejtave të fëmijëve, grave dhe vajzave të dhunuara? Atëkohë fshihej pas rrjeteve sociale duke mbrojtur kolegen, ndërsa sot është numri një i arsimit. I këtij arsimi që ka mbetur në mes të katër rrugëve.
Histerizimi kundër medias nga ana e ministrucëve të qeverisë nuk është mbi çështje parimore, por mirëfilltas mënyrë për të denigruar gjithçka që ajo nxjerr në skandale ku drejtëpërdrejtë janë përfshirë zyrtarë institucionesh. Niveli politik i drejtimit të Ministrisë së Arsimit është edhe më i rëndë se vetë incidentet dhe skandalet që përfshijnë në shkollat tona.
Mësimdhënia është në nivele të kritikueshme, baza materiale dhe librat e përzgjedhur e kanë futur arsimin sidomos parauniversitar në një mish-mash të madh. Nxënësit mësojnë me xhupa veshur nga i ftohti, duke pasur mbi krye edhe plasaritjet e shumta nga tërmeti që për shkak të cilësisë së ulët të punimeve ka dëmtuar një pjesë të mirë të shkollave sidomos në qarqet Durrës, Tiranë dhe Lezhë.
Kjo ministre që paska kaq shumë “karrierë” dhe “jetëgjatësi” 2 vjet që jeton në Shqipëri ende nuk e ka kuptuar se në tavolinën e punës së saj, (luks dhe pushtet) mbërrijnë shifra të tmerrshme, sesi shkollat në vend nuk kanë më fëmijë për të mësuar. Shumë kanë ikur në emigracion, qoftë edhe në azil ku ata vogëlushë që deri dje gjallonin godinat e bojatisura nga jashtë, por të dërmuara nga brenda, sot gjenden në kampet e luftës me një pjatë supë në duar.
Përderisa paska plot dy vite në Shqipëri, “gjithë ajo karrierë dhe barrë jetësore”, Shahini ende nuk po sheh sesi nxënësit në fshtrat e vendit degdisen në zona të tjera dukë bërë edhe dy orë rrugë në këmbë. Në rastet kur figuron ndonjë furgon, ngjishen 40 nxënës bashkë në udhëtime të rrezikshme, për të marrë dijen e cunguar.
Ministrja këtë situatë nuk do që ta shohë, por është prekur rëndë nga “virusi” i propagandës, aq sa edhe në këtë pikë nuk kanë një mendim të tyrin, por i referohen atij të “madhit”, kryeministrit Edi Rama. Me të drejtë, Shahini personalisht i është “mirënjohëse” pasi nga një anëtare OJQ-je u bë ministre, duke i dhënë mundësinë që këtë post ta përdorë si “autoshkollë”.
