Presidenti Ilir Meta tha se mbrojtja e Kushtetutës dhe integriteti i Gjykatës Kushtetuese është sot detyrë mbi detyra i çdo shqiptari të ndershëm dhe patriot dhe kryedetyra e Presidentit të Republikës.
Pasi depozitoi në SPAK kallëzimin penal ndaj ministres së Drejtësisë, Etilda Gjonajt, Meta tha se në grushtin e shtetit është përfshirë edhe celula drejtuese e Ministrisë së Drejtësisë.
“Në grushtin e shtetit, me metoda mafioze, tashmë me prova dhe fakte tronditëse, argumentohet marrja e kompetencave të Presidentit të Republikës.
Kallëzimi penal përfshin 3 titullarë të lartë të Ministrisë së Drejtësisë, përfshi këtu edhe ministren ende në detyrë, Etilda Gjonaj.
Do të shpartallojmë përmes kallëzimeve penale, pronave dhe fakteve të pakundërshtueshme, grushtin e shtetit”, tha Meta.
Ai paralajmëroi publikimin e të tjera provave, ndërsa ftoi qytetarët të jenë në bulevardin “Dëshmorët e Kombit” në datën 2 mars.
“Rreziku më i madh për ju është murtaja që quhet Rilindje”, tha Meta.
Në vijim ai pyeti nëse ka ndonjë Republikë në Europë apo në Botë, që në mënyrën më mafioze i rrëmbehet kompetenca Kushtetuese Presidentit të Republikës.
“Unë kam dalë në sheshin e betejës së vërtetë për çdo qytetar shqiptar që dëshiron të jetojë në liri, demokraci dhe aty ku ligji është i barabartë për të gjithë. Nuk ka ndodhur në asnjë vend të Europës që të ketë 3 vjet pa Gjykatë Kushtetuese, vetëm me qëllimin për t’a kapur atë në mënyrë mafioze, nuk ka asnjë vend në Europë që mos ketë Gjykatë të Lartë, që të ndodhin zgjedhjet lokale në kundërshtim me Kushtetutën. Nuk ka ndodhur asgjëkundi një grusht i tillë shteti, sikundër në Shqipëri”, tha Meta.
