U mbyllën dy ndeshjet e orës 14:00 të Kategorisë Superiore.
Laçi arriti një fitore të lehtë 1-3 në transfertën e Flamurtarit, ndërsa Vllaznia shkatërroi 4-0 Luftëtarin e Gjirokastrës.
Laçi e zgjidhi ndeshjen në pjesën e parë me dy golat e shënuar nga Nwabueze dhe Xhixha në minutat 20’ dhe 23’. Në pjesën e dytë, ekipi i drejtuar nga Armando Cungu, ngeli me 10 futbollistë pas kartonit të kuq të Turkaj-t në minutën e 51-të. Gjithsesi Laçi shënoi përsëri në minutën e 56-të me anë të Xhixhas duke trefishuar rezultatin.
Golin e vetëm për Flamurtarin, e shënoi Ribaj në minutën e 80-të, i cili ishte vetëm për statistikë.
Në ndeshjen tjetër Vllaznia zhbllokoi shpejt ndeshjen. Sidorenco, kur kishin kaluar çerek ore loje, me një goditje diagonale brenda zonës ia doli të mposhte portierin Arlis Shala. Ky ishte goli i vetëm në pjesën e parë, ndërkohë që në të dytën miqtë nga Gjirokastra u shfaqën të rrezikshëm dhe mund të barazonin me anë të Oshafit.
Silvio Junior ishte ai që i mbylli llogaritë, pasi shënoi golin e dytë me një goditje me kokë pas krosit të Gligorov. Tre minuta më pas shënoi një shkodran, Armenis Kukaj, por në portën e gabuar. Braziliani Junior i kishte lënë hapur llogaritë dhe në të 82′ ia doli të shënonte edhe golin e katërt për Vllazninë.
