“Të japë dorëheqjen”/ Gjonaj i kthen përgjigje “rrufe” Metës: Një marrëzi e radhës, jam e gatshme t’i përgjigjem ligjërisht

Ministria e Drejtësisë Etilda Gjonaj i ka kthyer përgjigje presidentit Ilir Meta i cili paralajmëroi se do të depozitojë në SPAK kallëzim ndaj saj për shpërdorim detyre. Madje Meta tha se Gjonaj e ka humbur besimin e Presidenti dhe do mirëpriste brenda ditës së hënë dorëheqjen e saj dhe përballjen me ligjin si ish-ministre.

Përmes një reagimi në rrjetet sociale Gjonaj, këtë e quan një marrëzi të radhës nga presidenti dhe se është e gatshme që të përballet ligjërisht me të. Sipas Gjonajt, Meta ka në dorë vetëm dorëheqjen e tij dhe jo të sajën.

“E përshëndes Presidentin që pas disa shfaqjesh publike pa ekuilibër etik, ka zgjedhur t’i drejtohet SPAK me një kallzim penal për mua; një marrëzi e radhës po të paktën në rrugë institucionale, madje drejt një institucioni të dalë nga Reforma që ai lufton pa fre! Jam e gatshme t’i përgjigjem ligjërisht, me të gjithë përgjegjësinë po edhe me krenarinë që i përkas Frontit të Reformës në Drejtësi, denigruesit botërisht të njohur të kësaj reforme jetike! Sa për dorëheqjen zotëria ka në dorë vetëm të tijën dhe të askujt tjetër.” – shkruan Gjonaj.

Beteja për Kushtetuesen/ Meta: Do çoj në SPAK ministren Gjonaj, të dorëhiqet!

LEXO EDHE  Ndahet nga jeta babai i gazetarit të njohur, mesazhi prekës