Presidenti Ilir Meta ka paralajmëruar se do të depozitojë në SPAK brenda së Hënës, kallëzim ndaj ministres së Drejtësisë Etilda Gjonaj dhe funksionarë të lartë të MD-së, për shpërdorim detyre. Shkelja, deklaroi kreu i shtetit në një deklaratë për mediat, ka lidhje me rolin që ka pasur Gjonaj në “rrëmbimin” siç e quajti ai, nga Kuvendi, të kompetencave të Presidencës për zgjedhjen e një anëtari të Gjykatës Kushtetuese.
Meta u shpreh se Gjonaj, për llogari të qeverisë dhe në kundërshtim me ligjin, urdhëroi botimin në Fletoren Zyrtare të vendimit të KED për publimin e listës përfundimtare për vendin vakant të Gjykatën Kushtetuese. Lista e KED kryesohej nga Arta Vorpsin, emër jo i zgjedhur nga Meta, i cili në vend të saj preferoi Marsida Xhaferllari.
Meta i bëri apel Gjonajt që të japë dorëheqjen nga detyra e ministres për tu përballur me drejtësinë.
Për orvatjen me qëllim “kapjen e Gjykatës Kushtetuese”, siç e quan Meta, ai ka thirrur një tubim në Tiranë më 2 Mars. Meta madje deklaroi këtë të premte se mazhoranca po organizon “grusht shteti”, duke marrë në mënyrë antikushtetuese pushtetin që Kushtetuta ia jep Presidentit, me qëllim kapjen e Gjykatës Kushtetuese.
Lidhur me çështjen e Gjykatës Kushtetuese, pritet dhe një opinion i Komisionit të Venecias, që është kërkuar njëkohësisht si nga mazhoranca ashtu dhe Presidenti Meta.
