Nga BoldNews.al
Drejtori i Përgjithshëm i Policisë së Shtetit, Ardi Veliu, deklaroi në një konferencë për median arrestimin e 115 personave në një operacion kombëtar kundër lojërave të fatit, i cili, me shumë mundësi do të rezultojë fiasko para gjykatës dhe me lirimin e shumicës absolute të të prangosurve.
Në komunikimin para medias, Veliu deklaroi se, në bazë të një hetimi disa-mujor në bashkëpunim me prokuroritë e disa rretheve gjyqësore, është siguruar vendimi i gjykatës për të ushtruar kontrolle në disa ambjente, në të cilat dyshohej se realizohej aktiviteti i paligjshëm i lojërave të fatit.
Pas këtij autorizimi, një numër i lartë punonjësish policie kanë ushtruar kontrolle në Tiranë e qytete të tjera, duke arrestuar në flagrancë mbi 100 persona.
Policia e Shtetit, në komunikimin zyrtar, ka bërë një përmbledhje të veprave penale, për të cilat ka dyshime se janë kryer nga personat e arrestuar.
Sipas kryepolicit Ardi Veliu, personat e arrestuar dyshohet se kanë konsumuar veprat penale të “ushtrimit dhe organizimit të lojërave të fatit dhe basteve pa leje, vënien në dispozicion të lokaleve për lojëra fati, fshehje të ardhurash dhe pastrim parash”.
Policia nuk ka specifikuar se sa është numri i personave të arrestuar për secilën nga veprat penale, por duket që numri më i madh i tyre është arrestuar për “organizim të lojërave të fatit” dhe “vënie në dispozicion të lokaleve për lojëra fati”.
Për të gjithë personat që Prokuroria do të regjistrojë procedimin për këto vepra penale, pritet të lirohen nga gjykata, nëse vetë prokurorët e çështjes nuk urdhërojnë lirimin e tyre.
Situata është shumë e thjeshtë- gjykata cakton masë sigurimi “arrest në burg” për personat që dyshohet se kanë kryer vepra penale, të cilat dënohen me maksimum 3 vjet burgim.
Veprat penale, për të cilat dyshohen pjesa dërrmuese e 115 të arrestuarve të “show-t” policor janë pikërisht për “organizim të lojërave të fatit” dhe “vënie në dispozicion të lokaleve për lojëra fati”, vepra penale të cilat dënohen me gjobë ose maksimum 6 muaj burgim.
1. Neni 197 i Kodit Penal, “Organizim i lojërave të fatit” (neni 197 i Kodit Penal), parashikon se “Organizmi i lotarive, lojërave të fatit apo bixhozit, në kundërshtim me dispozitat ligjore, përbën kundërvajtje penale dhe dënohet me gjobë ose me burgim gjer në tre muaj”.
2. Neni 198 i Kodit Penal, parashikon se “Vënia në dispozicion e lokaleve për organizimin apo luajtjen e lotarive, lojërave të fatit apo bixhozit, në kundërshtim me dispozitat ligjore, përbën kundërvajtje penale dhe dënohet me gjobë ose me burgim gjer në gjashtë muaj”.
Pra, të gjithë personat, për të cilët Policia dhe Prokuroria dyshojnë se kanë kryer një prej këtyre dy veprave penale, ose edhe të dyja bashkë, pritet të lirohen shumë shpejt. Dhe, natyrisht, këta persona përbëjnë shumicën dërrmuese të të arrestuarve të “super-operacionit” policor.
Me shumë mundësi, të vetmit që do të mbeten në qeli, pas këtij operacioni masiv, do të jenë ata, për të cilët Polici-Prokurori do të arrijnë të bindin gjykatës se kanë siguruar prova për kryerjen e veprave penale të “fshehjes së të ardhurave” dhe “pastrimit të produkteve të veprës penale”.
Pra, praktikisht për organizatorët, të cilët, në çdo rast, mund të jenë vetëm një grup i vogël personash.
