Ditën e sotme, ora 18:00 luhet në “Air Albania” supersfida mes Kukësit dhe Tiranës, ndeshje e vlefshme për javën e 23-të të Kategorisë Superiore.
Dy skuadrat mbajnë vendin e parë dhe të dytë në tabelën e klasifikimit, teksa verilindorët kryesojnë në kuotën e 42 pikëve ndërsa bardheblutë ndjekin me vetëm një pikë më pak.
Kukësi e ka mposhtur dy herë Tiranën në këtë sezon dhe kryeqytetasit do të tentojnë me çdo kusht të “hakmerren” në një farë mënyre ndaj verilindorëve dhe të ndërrojnë vendet me Kukësin kryesues.
Të dyja skuadrat vijnë në këtë ndeshje nga barazimet përkatëse në ndeshjet e tyre, teksa Kukësi u ndal në trasnfertë nga Bylisi 1-1, ndërsa Tirana barazoi me të njëjtin rezultat ndaj Skënderbeut.
Si Shpëtim Duro ashtu edhe Emanuel Egbo do të hedhin në fushë formacionet më të mira të mundshme me spektaklin që pritet të jetë i garantuar.
