Java e 22-të e Superligës shqiptare u hap ditën e djeshme me sfidën mes Tiranës dhe Skënderbeut, e cila përfundoi në barazim 1-1.
Ndërsa ditën e sotme do të luhen edhe 4 ndeshjet e fundit të cilat përmbyllin këtë javë. Luhen disa përballje mjaft interesante të cilat mund të ndryshojnë shumë në tabelën e klasifikimit.
Ndeshja që spikat më shumë është ajo mes Bylisit dhe Kukësit e cila luhet në orën 14:00. Verilindorët po kalojnë një moment pozitiv dhe në transfertën Bylisit do të tentojnë të përfitojnë nga ndalesa e Tiranës me Skënderbeun për tu shkëputur me tre pikë në krye të renditjes.
Nga ana tjetër Bylisi edhe pse nuk ka fituar asnjë ndeshje gjatë vitit 2020 në kampionat vjen me moral mjaft të lartë pas një kualifikimi tërësisht të merituar në çerekfinalet e Kupës së Shqipërisë përballë Laçit.
Po në orën 14:00 do të luhet një tjetër ndeshje fortë. Laçi prêt në shtëpi Partizanin. Kampionët në fuqi pas fitores kundër Flamurtarit do të kërkojnë vazhdimësinë dhe të lënë pas rezultat negative.
Beteja për fitoren për skuadrat do të jetë e fortë, nga vetë fakti që skuadrat luftojnë për një vend në kupat Europiane.
Dy sfidat e fundit janë ato mes Luftëtarit dhe Flamurtarit po në orën 14:00, ndërsa në orën 17:00 vëmendja spostohet në stadiumin “Niko Dovana” të Durrësit, ku Teuta vendase do të presë Vllaznisë.
